ق ر ەنەرگەتيكا ءمينيسترى قانات بوزىمبايەۆ استانا اسپانىن تۇمشالاعان كوك تۇتىننەن قۇتىلۋ جولدارىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ.  

«بۇل پروبلەمانى شەشۋ جولى – نەگىزىنەن جەكە سەكتور مەن وتىن-ەنەرگەتيكا كەشەندەرىنە ارنالعان ساپالى وتىن. ياعني استانادا كومىر جاعۋدى قويۋدى كەرەك. بۇل جەرگە گاز تارتىپ، ونىڭ باعاسىن قولجەتىمدى ەتۋ كەرەك. ءقازىر بۇل جۇمىس جالعاسىپ جاتىر، ونىڭ ۇستىنە ءبىرىنشى ۆيسە-پرەمەر دەڭگەيىندە تالقىلانۋدا»، — دەدى بوزىمبايەۆ ۇكىمەت كۋلۋارىندا.  

مينيستر اتالعان تۇيتكىلدى شەشۋگە قاتىستى ۇسىنىسىن ايتتى.

«بىزگە سۇيىتىلعان تابيعي گاز كەرەك، پروپان-بۋتانمەن شاتاستىرماڭىزدار. قازاقستاندا ازىرگە ول وندىرىلمەيدى نەمەسە قوستانايدا ونى وندىرەتىن زاۋىت سالىپ، ونى وسى جەرگە اكەلىپ، سۇيىلتۋعا بولادى. ارينە، بۇل ءبىراز قىمباتقا تۇسەدى»، — دەدى بوزىمبايەۆ. 

ۆەدومستۆو باسشىسى ەگەر بۇل ماسەلە مۇقيات قارالماسا، جىلۋ ەنەرگياسىنىڭ باعاسى كۇرت ءوسىپ كەتۋى مۇمكىن ەكەنىن اتاپ ءوتتى. 

«ەگەر قازترانسگاز سالعان قۇبىرلاردىڭ تەن-نە قاراساق، بۇل گازدى جەتكىزۋ جىلۋ قۇنىنىڭ ەداۋىر وسۋىنە اكەپ سوعۋى مۇمكىن. سوندىقتان ءقازىر بۇل پروسەستى ارزانداتۋ تاسىلدەرى قاراستىرىلۋدا. كومىر ارزان ەنەرگيا تاسىمالداۋشى ەكەنى تۇسىنىكتى. ونىڭ ۇستىنە ول جاقىن، ال گاز الىستا. ءبىراق تاڭداۋ جاساعاندا ەڭ الدىمەن ادام دەنساۋلىعى مەن ەكولوگيانى ويلاۋ كەرەك»، — دەدى مينيستر. 

"استاناداعى كوك ءتۇتىن ءسىزدى دە مازالاي ما؟" دەگەن ءجۋرناليستىڭ ساۋالىنا مينيستر مىرزا "ارينە" دەپ جاۋاپ بەردى.