اتىراۋ قالاسىنىڭ ماڭىنداعى اۋىلداردىڭ سۋ قۇبىرلارىنداعى اقاۋلار تۇزەلىپ، سۋ بەرىلە باستادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

ەسكە سالا كەتسەك، قالا ماڭىنداعى كۋريلكينو، ۆودنيكوۆ، ۆودنيكوۆ-2، كوك ارنا، العاباس جانە تاسقالا اۋىلدارىندا سەيسەنبى كۇنى سۋ بەرۋ توقتاتىلىپ، بۇل جايت الەۋمەتتىك جەلىدە قىزۋ تالقىعا تۇسكەن بولاتىن. جوندەۋ بريگادالارى اقاۋ تابىلعان جەردە جارتى تاۋلىكتەي جۇمىس ىستەپ، قۇبىرلاردى رەتكە كەلتىردى. الايدا تاڭەرتەڭ ۆودنيكوۆ-2 اۋىلىندا تاعى ءبىر اقاۋ شىقتى.

«قازىرگى ساتتە سۋمەن قامتۋ جەلىسىندەگى بۇكىل تەحنيكالىق اقاۋلار جويىلدى. قالا ماڭىنداعى اۋىلدارعا سۋ شتاتتىق رەجيمدە بەرىلىپ جاتىر»، - دەپ مالىمدەدى «اتىراۋ سۋ ارناسى» كمك باسپا ءسوز قىزمەتى.

دەگەنمەن وسى ماسەلە الەۋمەتتىك جەلىدە كوپ تالقىلانىپ جاتقان تاقىرىپتاردىڭ ءبىرى بولىپ قالۋدا. زارداپ شەككەن اۋىلداردىڭ تۇرعىندارى قاقاعان اياز بولسا، بىلتىر قىستا جاتقىزىلعان قۇبىرلار مۇز قاتقان توپىراقتىڭ قىسىمىنا توزە الماۋى مۇمكىن ەكەنىن ايتىپ، الاڭداپ وتىر.