المالى اۋدانى اۋماعىندا 26 مەديسينا مەكەمەلەرى ورنالاسقان. بارلىق مەديسينا مەكەمەلەرىندە يننوۆاسيالىق تەحنولوگيالار ەندىرىلۋدە. دياگنوستيكانىڭ زاماناۋي تۇرلەرى قولدانىلىپ، كۇردەلى وتا جاسالۋدا. بۇل تۋرالى اۋدانىنىڭ اكىمى جاسۇلان ەستەنوۆ الماتى قالاسى وڭىرلىك كوممۋنيكاسيالار قىزمەتىندە وتكەن بريفينگتە ايتتى دەپ حابارلايدى Qamshy.kz اقپارات اگەنتتىگى.  

اۋدان باسشىسىنىڭ اقپاراتىنا سۇيەنسەك، مەديسينا مەكەمەلەرىندە قازىرگى تاڭدا شەتەلدىك ماماندار ءتۇرلى ماستەر-كلاسستار وتكىزۋدە. مىسالى، قالالىق كارديولوگيالىق ورتالىق قازاقستانداعى جۇمىس جاساپ تۇرعان جۇرەككە وتا جاساۋدىڭ 60 %-دان استامى جۇزەگە اسىرىلاتىن بىردەن-بىر ورتالىق بولسا، جەدەل شۇعىل كومەك كورسەتۋ ورتالىعىندا جىلىنا 5000-نان استام وتا جاسالادى. سونداي-اق، بيىلعى جىلى مەديسينانىڭ سوڭعى تەحنولوگيالارىمەن جابدىقتالعان رەپرودۋكتيۆتىك مەديسينا ينستيتۋتىنىڭ جاڭا فيليالى قولدانىسقا بەرىلدى. 

اۋدان اۋماعىندا 65 000 اسا ستۋدەنت وقيدى، ياعني قالا ستۋدەنتتەرىنىڭ 40%-ى. اعىمداعى جىل الماتى قالاسى اكىمىمەن «جاستار جىلى» دەپ اتالدى. سول سەبەپتەن اۋدان جاستار كوپتەگەن ءىس-شارالارعا قاتىستىرىلادى. جاستاردىڭ دامۋى مەن بوس ۋاقىتىن ءتيىمدى وتكىزۋى ءۇشىن بۇرىنعى ترامۆاي دەپوسىنىڭ ورنىندا جاستارعا ارنالعان لوفت-ورتالىق اشىلدى،-دەپ حابارلادى اۋدان اكىمى جاسۇلان توققوجا ۇلى.