الماتى اكىمى باۋىرجان بايبەك جۇمىس ساپارى اياسىندا الاتاۋ اۋدانىنداعى يندۋستريالدى ايماقتا بولدى، مۇندا بۇگىنگى كۇنى قۇرىلىس، فارماسيەۆتيكا، حيميا، تاماق، جەڭىل ونەركاسىپ سالالارى بويىنشا 40 ءىرى وتاندىق جانە شەتەلدىك جوبالار جۇزەگە اسۋدا.

يندۋستريالدى ايماقتى ارالاعان باۋىرجان بايبەك «ALATAU» ساۋدا ماركاسى بار كارتريدجدەر مەن كۇن باتارەيالارىن شىعاراتىن جاڭا ءوندىرىس ورنىمەن تانىستى، دەپ جازادى Qamshy.kz اقپارات اگەنتتىگى.

كومپانيانىڭ باس ديرەكتورى مۇرات راحىمجانوۆ العاشقى وندىرىستىك جەلىنىڭ جىلىنا 75 مىڭنان استام كارتريدجدەر شىعاراتىنىن، 2019 جىلعا دەيىن ءوندىرىس كولەمىن ەكى ەسەگە اتترىۋدى جوسپارلاپ وتىرعاندىقتارىن ايتتى. كاسىپورىندا 40 ادام جۇمىس ىستەيدى، الايدا ءوندىرىس قۋاتى ارتقان كەزدە جاڭا جۇمىس ورنى ەكى ەسە وسەتىن بولادى. ءونىم اسسورتيمەنتى «ALATAU» كارتريدجدەرىنىڭ 150-دەن استام مودەلىن قۇرايدى.

«مەملەكەت باسشىسىنىڭ تاپسىرماسى بويىنشا مەگاپوليسكە قوسىلعان ەلدى مەكەندەردە بارلىق جاعدايلار جاسالۋدا. الاتاۋ جانە ناۋرىزباي اۋداندارى ورتالىقتاندىرىلعان قاعيداسى بويىنشا دامۋدا جانە وزدىكتەرىنەن وركەندەۋ ۇستىندە. الاتاۋ اۋدانىنداعى يندۋستريالدى ايماق كاسىپكەرلىككە قولداۋ كورەستۋ ماقساتىندا قۇرىلعان، ەڭ الدىمەن الماتىنىڭ الەۋەتتى ءوندىرىس ورىندارىن دامىتۋعا باعىتتالعان. مۇندا ءبىرىنشى كەزەكتە قالانىڭ تۇرعىلىقتى جەرلەرىندەگى ءوندىرىس ورىندارىن وسى ايماققا كوشىرەتىن ينۆەستيسيالىق جوبالارعا، يمپورتتى الماستىرا الاتىن تەحنولوگيالىق، ينوۆاسيالىق ونىمدەر شىعارۋعا جەتە نازار اۋدارىلادى. كاسىپورىنداردىڭ اشىلۋى الاتاۋ اۋدانىندا جاڭا جۇمىس ورىندارىنىڭ پايدا بولۋىنا كەڭ جول اشادى»، - دەپ اتاپ ءوتتى باۋىرجان بايبەك.

الماتى اكىمى جۇمىس ساپارى بارىسىندا كابەل جەلىلەرىن شىعاراتىن رەسەيلىك «كمك Investment» زاۋىتىنىڭ، ۇلكەن ديامەترلى بولات قۇبىرلارىن شىعاراتىن قىتايلىق «Asia Steel Pipe Company» زاۋىتىنىڭ، ينجەنەرلىك جۇيە قاۋىپسىزدىگىن قامتاماسىز ەتەتىن جاپوندىق جاڭا «Tokyo Rope Almaty» زاۋىتىنىڭ قۇرىلىسىمەن تانىستى.