نازاربايەۆ: ءبىز قىرعىزستانعا ەشقاشان ءسوز تيگىزگەن ەمەسپىز

/uploads/thumbnail/20171225165614968_small.jpg

بۇگىن قىرعىزستان پرەزيدەنتى سوورونباي جەەنبەكوۆ استاناعا رەسمي ساپارمەن كەلدى، دەپ حابارلايدى Qamshy.kz اقپارات اگەنتتىگى.

ساپارى بارىسىندا جەەنبەكوۆ قازاقستان پرەزيدەنتى نۇرسۇلتان نازاربايەۆپەن جەكە كەزدەستى. كەزدەسۋدە ەلباسى قىرعىز باسشىسىنىڭ ساپارىنا اق جول تىلەپ، ەكى ەلدىڭ دوستىق قارىم-قاتىناسىنىڭ ماڭگى ساقتالۋىنا سەنىم ءبىلدىردى.

«مەنiڭ شاقىرۋىممەن رەسمي ساپارمەن باستاعان جولىڭىز اق بولسىن، قۇتتى بولسىن. باستاعان جولىمىز ەكى ەلدىڭ دوستىعى مەن بولاشاعىنا جۇمىس ىستەسىن. سىزدەردى قۋانىشپەن قارسى الامىز. ءسىز باستاپ كەلگەن قىرعىز دەلەگاسياسىنىڭ ءاربىر ماسەلەسىن شەشۋگە قازاقستان ءار ۋاقىتتا دايىن. 26 جىل تاۋەلسىزدىكتە ءومىر ءسۇرىپ كەلەمىز.

قازاقستان ەشقاشان قىرعىزستانعا ءسوز تيگىزىپ، جامانشىلىق قادام جاساعان ەمەس. ءبىز كەلەمىز، كەتەمىز، ال ەكى ەل كورشى بولىپ قالادى. بۇرىننان سولاي جالعاسىپ كەلەدى. سوندىقتان ءار بۋىننىڭ بويىنداعى جىگەر سول جاقسىلىقتى، دوستىقتى قارىم-قاتىناستى تازا كۇيىندە كەلەسى بۋىنعا تاپسىرادى»، - دەدى نازاربايەۆ.

سونداي-اق جاقىندا عانا پرەزيدەنت بولعان جەەنبەكوۆكە تىلەگىن ايتتى.

«بۇكىل حالىق بولىپ ءسىزدى سايلادى، سەنىم ءبىلدىردى. سول سەنىمدى اقتاۋىڭىزعا اللا كۇش-قۋات بەرسىن!»، - دەدى مەملەكەت باسشىسى.

ءوز كەزەگىندە، سوورونباي جەەنبەكوۆ جىلى شىرايمەن قارسى العان نۇرسۇلتان نازاربايەۆقا العىسىن جەتكىزدى.

«ءبىزدى جىلى شىرايمەن كۇتىپ الدىڭىزدار. پرەزيدەنت بولىپ سايلانعاندا جاقسى تىلەگىڭىزدى ءبىلدىردىڭىز. ءبىز ءۇشىن سىيلى ازاماتسىز. ءار ايتقان تىلەگىڭىز ءۇشىن العىس ايتامىن.

ەكى ەلدىڭ دوستاستىعى اياسىندا ايانباي ەڭبەك ەتەمىن دەپ ۋادە بەرەمىن!»، - دەدى جەەنەبەكوۆ.  

قازiر قوس مەملەكەت باسشىسى كەڭەيتىلگەن قۇرامدا كەلىسسوز جۇرگىزىپ، ەۋرازيا ەكونوميكالىق وداعى (ەاەو) اياسىنداعى ىنتىماقتاستىق ماسەلەلەرىن تالقىلاۋدا.

پىكىر قالدىرۋ

قاتىستى ماقالالار