نازەركە ءارىپتىڭ تۋعان اپكەسى جازيرا سىبانبايەۆا Facebook الەۋمەتتىك جەلىسىندە جوعارى سوتتان ءسىڭلىسىن ولتىرگەن قىلمىسكەردى ءومىر بويى باس بوستاندىعىنان ايىرۋدى سۇراپ جازبا قالدىرعان دەپ حابارلايدى Qamshy.kz اقپارات اگەنتتىگى. 

«نازەركە تاكسيگە وتىرعان. كولىكتى كۇدىكتى يسحاكوۆ كۋربان جۇرگىزگەن. قىلمىسكەردى ىزدەۋ ءۇشىن قازاقستاننىڭ تۇكپىر-تۇكپىرىنەن تۋىستارىمىز كەلسە دە ونى ۇستاۋ ءۇشىن كوپ ۋاقىت كەتتى. يسحاكوۆ كۋربان بۇعان دەيىن 3 رەت سوتتالعان. ونىڭ ىشىندە كىسى ءولتىرۋ ايىبى دا بار، ءبىراق شارتتى تۇردە مەرزىمىنەن بۇرىن بوساپ شىققان. يسحاكوۆ كۋربان نازەركەنى كەنسايداعى زيراتقا اپارىپ ولتىرگەنى انىقتالدى. نازەركەنىڭ دەنەسى 2 اي بويى كۇننىڭ استىندا جاتىپ، بۇزىلعان. سوڭعى تىڭداۋدا يسحاكوۆ كۋربان 3 ايىپپەن (زورلاۋ، قاساقانا كىسى ءولتىرۋ، مۇلكىن تاپتىر الۋ) كەلىسپەيتىنىن ايتىپ، تەك ولتىرگەنىن عانا مويىنداعان. ءبىز ونىڭ زاڭعا سايكەس ءوز جازاسىن الاتىنىنا ۇمىتتەنەمىز. ول بۇرىنعىداي جاقسى ءتارتىبى ءۇشىن ەرتە بوساپ شىعامىن دەپ ۇمىتتەنىپ وتىرعان شىعار. سەبەبى بۇرىندا سولاي بولدى عوي! قىزدىڭ ءومىرىن ويران ەتتى! ول تۇرمەدەن شىققاننان كەيىن قايتا وسىنداي قاسىرەتتىڭ قايتالانۋى مۇمكىن بە؟ ءبىز ونىڭ ءومىر بويى باس بوستاندىعىنان ايىرۋ جازاسىن سۇرايمىز!» دەپ جازدى جازيرا سىبانبايەۆا.  

ايتا كەتەيىك، 18 جاستاعى الماتىلىق نازەركە ءارىپ 10 ماۋسىمدا ساعات 16:00-دە ۇيىنەن شىعىپ، قايتا ورالماعان. تەك 6 قىركۇيەكتە قىزدىڭ ءولى دەنەسى كەڭسايداعى زيراتتىڭ ماڭىنان تابىلدى. نازەركە ءارىپتىڭ ولىمىنە قاتىسى بار كۇدىكتى ۇستالدى. كۇدىكتى الماتى وبلىسى تالعار اۋدانىنىڭ 1984 جىلعى تۇرعىنى. بۇل تۋرالى الماتى قالاسى ءىىد قىلمىستىق پوليسيا باسقارماسىنىڭ باستىعى، پودپولكوۆنيك جانبولات زيادين حابارلادى.