اقتوبەدە وبلىستىق اكىمدىكتە جاستار ماسەلەسى تالقىلاندى دەپ حابارلايدى Qamshy.kz اقپارات اگەنتتىگى aktobenews.kz سايتىنا سىلتەمە جاساي وتىرىپ. ءوڭىر باسشىسى بەردىبەك ساپاربايەۆ جاستارمەن جۇمىسقا جاۋاپتى قىزمەتتى باسقارىپ جۇرگەن باسشىلاردى جينادى. قۇر ەسەپ بەرۋدەن قۇرالعان باسقارما باسشىلارىنىڭ بايانداماسى اكىمنىڭ كوڭىلىنەن شىققان جوق. جيىندا وبلىستىڭ يدەيالوگياسىن باسقارىپ وتىرعان بۇلبۇل وراققىزىنان باستاپ سپورت باسقارماسىن باسقارىپ جۇرگەن نۇرلىبەك ءجۇسىپوۆ تە اكىمنەن ءسوز ەستىدى.
«سپورت نىساندارى نەگە كەشكىلىك جابىق تۇرادى؟ مەن جاقىندا عانا اپپاراتتىڭ ادامدارىن تەكسەرۋگە جىبەردىم. كەشكىلىك، دەمالىس كۇندەرى سپورت نىساندارى جابىق تۇرادى. قاراڭعى بولىپ تۇرعان جەرگە ءبىر ادام بارمايدى. سوندا جاستار قايدا بارادى، ءبىز ول نىسانداردى نە ءۇشىن سالىپ جاتىرمىز؟ نۇرلىبەك، سەن قاي اۋداندا اكىمنىڭ ورىنباسارى بولىپ ەدىڭ؟»، — دەدى بەردىبەك ساپاربايەۆ «مۇنشا ادام سپورتپەن اينالىسادى، مۇنشاما سپورت نىسانىن سالدىق» دەپ بايانداماسىن سۋدىراتىپ وقىپ تۇرعان سپورت باسقارماسىنىڭ باسشىسىن توقتاتىپ.
«ىرعىز اۋدانىندا»، — دەدى نۇرلىبەك ءجۇسىپوۆ.
«ءبارىن «قاتىرىپ جاتىرمىن» دەپ جاۋاپ بەرۋگە ۇيرەنىپ قالعانسىڭ. سەنى باسقارماعا قويعانداعى تالاپتى ءوزىڭ بىلەسىڭ، سونى جويۋعا جۇمىس جاساۋ كەرەك ەمەس پە، اينالايىن؟! جاپ-جاس جىگىتسىڭدەر، ۇيىقتاپ جۇرەسىڭدەر»، — دەدى ساپاربايەۆ.
سونىمەن قاتار، وبلىس اكىمى سپورت نىسانىن جاستاردىڭ يگىلىگىنە تيىسىنشە پايدالانا الماي وتىرعان جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى باۋىرجان ەردەمبەكوۆتى دە ۇيالتتى.
پىكىر قالدىرۋ