مادەنيەت جانە سپورت ءمينيسترى ارىستانبەك مۇحامەدي ۇلى ءانشى تورەعالي تورەالىنىڭ پاۆلودارداعى داۋلى كونسەرتىنە قاتىستى پىكىر ءبىلدىردى، - دەپ حابارلايدى Qamshy.kz اقپارات اگەنتتىگى Tengrinews.kz تىلشىسىنە سىلتەمە بەرىپ.

ءمينيستردىڭ ايتۋىنشا، بۇل وقيعا كونسەرت يندۋسترياسىن زاڭنامامەن رەتتەۋدى قاجەت ەتەتىنىن كورسەتكەن.

"ءقازىر بىزدە، وكىنىشكە قاراي، كەز كەلگەن ادام كونسەرت ۇيىمداستىرا الادى، ءانشىنىڭ ءوزى دە ۇيىمداستىرا الادى. مۇنداي وقيعا بولدى ما، وندا ءبىز شارا قولدانۋىمىز قاجەت. مەن ءارقاشان كورەرمەندى قۇرمەتتەۋ كەرەك دەگەن ويدامىن"، - دەدى مينيستر.

ارىستانبەك مۇحامەدي ۇلى مۇنداي جاعدايلار قايتالانباۋى ءۇشىن مينيستر رەتىندەگى مىندەتى قازاقستاندىق كونسەرت يندۋسترياسىن وركەنيەتتى نارىققا كەلتىرۋ كەرەك ەكەنىن اتاپ ءوتتى.  

"بار ماسەلە بۇل سالانىڭ زاڭ تۇرعىسىندا رەتتەلمەگەنىندە بولىپ تۇر. مىسالى، كەز كەلگەن ادام كونسەرت ۇيىمداستىرا الادى. الەمدە كونسەرت ۇيىمداستىرعىسى كەلگەندەر ليسەنزيا الادى. ءقازىر ءبىز ونى (تورەعالي تورەالىنى - اۆت.) جاقتاۋىمىز دا، داتتاۋىمىز دا مۇمكىن. ال كونسەرت ۇيىمداستىرۋمەن كاسىبي ۇيىم اينالىسسا، ۇيىمداستىرۋشىلاردان مۇنداي جاعدايعا نەلىكتەن جول بەرىلگەنىن، ءانشىنىڭ قانداي كۇيدە بولعانىن سۇراي الار ەدىك، ءقازىر ونىڭ ءتىپتى اقىلعا قونىمسىز ارەكەت جاساعانىن ايتىپ، تالقىلاپ جاتىر. بارلىعىن دا زاڭمەن رەتتەۋ كەرەك دەپ ەسەپتەيمىن"، - دەدى مۇحامەدي ۇلى.

تانىمال ءانشى تورەعالي تورەالىنىڭ پاۆلودار قالاسىنداعى ءان كەشىندە ساحنادا ايتقان سوزدەرى دەمالىس كۇندەرىندە ەل تۇرعىندارى جاپپاي تالقىلاعان باستى تاقىرىپقا اينالعان. ءتىپتى ۇلتتىق ماسەلەلەردەن گورى تورەعاليدىڭ ءىسى ماڭىزدىراق بولىپ كەتكەنى جاسىرىن ەمەس.