قازاقستان ۇكىمەتى New York Mellon بانكىنىڭ قازاقستان ۇلتتىق قورىنىڭ 22 ميلليارد دوللار اكتيۆىن بۇعاتتاۋ شەشىمىنە قارسىلىق ءبىلدىرىپ، سوتقا بەردى دەپ حابارلادى سەيسەنبىدە ادىلەت ءمينيسترى مارات بەكەتايەۆ. بۇل جايىندا Qamshy.kz اقپارات اگەنتتىگى ازاتتىقتىڭ مالىمەتىنە سۇيەنىپ حابارلايدى. 

اقش-تىڭ New York Mellon (BK.N) بانكى وتكەن اپتادا قازاقستاننىڭ ۇلتتىق قورىنا تيەسىلى 22 ميلليارد اقش دوللارى كولەمىندەگى اكتيۆىن بۇعاتتاعانىن حابارلاعان. مۇنداي شەشىم قازاقستان ۇكىمەتى مەن مولدوۆالىق ينۆەستوردىڭ اراسىنداعى داۋ ورشىگەن كەزدە قابىلدانعان. مولدوۆالىق كاسىپكەر اناتول (اناتوليي) ستاتي مەن وعان تيەسىلى بىرنەشە كومپانيا قازاقستان ۇكىمەتىن وزدەرىن شىعىنعا ۇشىراتتى دەگەن ارىز بويىنشا بۇعان دەيىنگى ءبىر سوتتا جەڭىپ شىققان. بانكتەگى دەرەك كوزىنىڭ ايتۋىنشا، ەندى ارىزدانۋشى شىعىنىن وتەۋ تۋرالى شاعىم ءتۇسىرىپ، قازاقستاننىڭ مۇناي تابىسىنان قۇرالعان ۇلتتىق قورىنىڭ 40 پايىزىن بۇعاتتاۋعا قول جەتكىزگەن.

استانادا ۇكىمەت وتىرىسىنان سوڭ جۋرناليستەر ساۋالىنا جاۋاپ بەرگەن مارات بەكەتايەۆتىڭ ايتۋىنشا، استانا اقش بانكىنىڭ ۇلتتىق قور اكتيۆىن بۇعاتتاعانىنا نارازىلىق ءبىلدىرىپ، انگليا جوعارعى سوتىنا تالاپ-ارىز تۇسىرگەن. ول قور اكتيۆى قازاقستان مەنشىگىندە قالا بەرەىنىن، ءبىراق تاياۋ ۋاقىتتا ونى باسقارۋ مۇمكىن بولمايتىنىن ايتادى.

«قاۋىپ-قاتەر تالاپ ەتىلگەن شىعىن كولەمى – 500 ميلليونداي دوللارمەن شەكتەلەدى. 22ء-نى [ميلليارد دوللار – رەد.] ەشكىم ەشقاشان الىپ قويمايدى. بۇل ءىس لوندون سوتىندا قارالادى. الاياقتىق ءىسى بويىنشا تىڭداۋ 2018 جىلدىڭ قازانىنا بەلگىلەندى. ءبىز ءتىپتى تالاپ ەتىلگەن سومانى دا بەرمەيمىز. سەبەبى اربيتراجدىق سوت شەشىمى الاياقتىق جولمەن شىعارىلعان دەپ بىلەمىز» دەدى بەكەتايەۆ.

ال ۇلتتىق بانك ءتوراعاسى دانيار اقىشيەۆ مولدوۆالىق بيزنەسمەندەر تالاپ ەتكەن قارجى سوماسى اقش بانكى بۇعاتتاعان قارجى كولەمىمەن ساي كەلمەيتىنىن، استانانىڭ بۇل شەشىمگە شاعىمدانۋ مۇمكىندىگى بارىن ايتادى.

«ءبىز كاستوديان-بانك تالاپەتىلگەن قارجى كولەمى تەڭدەي ەمەسىن كورە تۇرىپ، اكتيۆتەردى بۇعاتتاپ، زاڭعا قارسى ءىس جاسادى دەپ ويلايمىز. ەكىنشىدەن، بۇل اكتيۆ ورنالاسقان جەردىڭ يۋريسديكسياسىنا قايشى دەپ بىلەمىز» دەدى اقىشيەۆ.

قازاقستان پرەمەر-مينيسترىنىڭ ورىنباسارى جانە اۋىل شارۋاشىلىق ءمينيسترى ءومىرزاق شۇكەيەۆ قازاقستانعا بايلانىستى ءتۇرلى سوتتا ءىس قارالىپ جاتقانىن جانە ونىڭ اعىمداعى جايت ەكەنىن ايتتى. «بۇل جەردە جاڭاعى مولداۆيانىڭ ءبىر ينۆەستورى سونداي شاعىم بەرىپ، وسىنداي شەشىم قابىلدانعان. ول وزگەرەدى دەپ ويلايمىن. ويتكەنى، ءبىزدىڭ دە جاڭاعى ءتيىستى زاڭگەر، زاڭ كومپانيالارىمىز جۇمىس ىستەپ جاتىر» دەدى شۇكەيەۆ.

قازاقستان قارجى ءمينيسترى باقىت سۇلتانوۆ جۋرناليستەردىڭ "سوت شەشىمىمەن بۇعاتتالعان 22 ميلليارد دوللار" تۋرالى ساۋالىنا ول جايىندا "حابارى جوعىن" عانا ايتتى.