نۇرسۇلتان نازاربايەۆ تمد ەلدەرى باسشىلارىنىڭ بەيرەسمي سامميتىنە قاتىسۋعا شاقىرعانى ءۇشىن ۆلاديمير پۋتينگە العىس ءبىلدىرىپ، وتكەن كەلىسسوزدەردىڭ تابىستى بولعانىن ايتتى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

– ەلدەرىمىز اراسىندا شەشىمىن تاپپاعان ماسەلە جوق. تاۋەلسىزدىكتىڭ 26 جىلى ىشىندە ءبىز بىر-بىرىمىزگە جاقىن بولا تۇستىك، شارتتىق بازانى قالىپتاستىرىپ، ءوزارا ىنتىماقتاستىق ءۇشىن قولايلى جاعداي جاسادىق، – دەدى قازاقستان پرەزيدەنتى.

مەملەكەت باسشىسى ەۋرازيالىق ينتەگراسيا ماسەلەلەرىنە ەرەكشە توقتالىپ، قازاقستان مەن رەسەي اراسىنداعى ىنتىماقتاستىقتىڭ تابىستى ەكەنىن اتاپ ءوتتى.

– ءبىز بارلىق ماسەلەلەر بويىنشا، سونىڭ ىشىندە كاسپيي تەڭىزى، «بايقوڭىر» عارىش ايلاعى جونىندە كەلىسسوز جۇرگىزدىك. عارىشتى يگەرۋ سالاسىندا ەكولوگيالىق تۇرعىدان تازا جانارمايمەن جۇمىس ىستەيتىن زىمىران تاسۋشىلاردىڭ جاڭا ءتۇرىن جاساۋ جوسپارلانىپ وتىر، – دەدى نۇرسۇلتان نازاربايەۆ.

رەسەي فەدەراسياسىنىڭ پرەزيدەنتى ەكىجاقتى قارىم-قاتىناستار تابىستى دامىپ كەلە جاتقانىنا توقتالىپ، جوعارى ساراپشىلىق دەڭگەيدەگى مامانداردىڭ سيفرلىق تەحنولوگيالاردى دامىتۋعا ارنالعان كەزدەسۋىن قازاقستاندا وتكىزۋ جونىندەگى باستاماسى ءۇشىن نۇرسۇلتان نازاربايەۆقا العىس ايتتى.

– بيىلعى 10 ايدىڭ ىشىندە ەلدەرىمىز اراسىنداعى تاۋار اينالىمىنىڭ ءوسىمى 34 پايىزدى قۇرادى. ەڭ ماڭىزدىسى ءارى پەرسپەكتيۆاعا باعىتتالعانى – سيفرلىق تەحنولوگيالار سالاسىنداعى ءبىزدىڭ ىنتىماقتاستىعىمىز بەن بىرلەسكەن جۇمىسىمىز. قازاقستان ەكونوميكا، وڭىرلىك جانە حالىقارالىق قاۋىپسىزدىك، سونداي-اق ەلدەرىمىزدىڭ قورعانىس قابىلەتىن قامتاماسىز ەتۋ سالالارىندا ءبىزدىڭ نەگىزگى سەرىكتەسىمىز بولدى جانە سولاي بولىپ قالا بەرمەك، – دەدى رەسەي پرەزيدەنتى.

سونداي-اق، كەزدەسۋ بارىسىندا مەملەكەتتەر باسشىلارى ەنەرگەتيكا، عارىشتى يگەرۋ جانە سيفرلىق ەكونوميكا سالاسىنداعى ىنتىماقتاستىق ماسەلەلەرىن تالقىلادى.