مەملەكەت باسشىسى «قازاقستان رەسپۋبليكاسى ۇكىمەتى مەن گرۋزيا ۇكىمەتى اراسىنداعى قازاقستان رەسپۋبليكاسى ۇكىمەتىنىڭ گرۋزيا ۇكىمەتىنە بەرگەن مەملەكەتتىك كرەديتتەرى بويىنشا گرۋزيا ۇكىمەتىنىڭ بەرەشەگىن قايتادان قايتا قۇرىلىمداۋ تۋرالى كەلىسىمدى راتيفيكاسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

بۇدان بۇرىن قارجى ءمينيسترى باقىت سۇلتانوۆ قارىز مولشەرى $27 ملن 774 مىڭ قۇرايتىنىن ايتقان. بۇل بەرەشەك 1992-1993 جىلدارى ەكى ەلدىڭ ۇلتتىق بانكتەرى اراسىندا ءوزارا ەسەپ ايىرىسۋ ناتيجەسىندە پايدا بولىپ، مەملەكەتتىك نەسيە رەتىندە قايتا راسىمدەلگەن. سوعان سايكەس، ءبىر جىلدىق مولشەرلەمە 4% دەڭگەيىندە ساقتالىپ، پاريج كلۋبى ۇسىنىستارىنا ساي قارجىنى وتەۋ مەرزىمى ۇزارتىلعان. وسىلايشا 2017-2025 جىلدار ارالىعىندا گرۋزيا تاراپىنىڭ تولەمدەر سوماسى $37 ملن 997 مىڭ-عا جەتتى. ياعني وسىنشا قاراجات الداعى 8 جىل ىشىندە بيۋدجەت ءبۇيىرىن تولىقتىرۋى ءتيىس بولعان.