الماتىداعى رەسپۋبليكا سارايى «الماتى اۋەندەرى» مكقك قاراماعىنا بەرىلدى، دەپ حابارلايى Qamshy.kz اقپارات اگەنتتىگى قازاقپارات مالىمەتىنە سۇيەنىپ.

وسى ۋاقىتقا دەيىن كونسەرت الاڭى قالالىق مادەنيەت جانە مۇراعات باقارماسىنا قاراپ كەلگەن بولاتىن. 28 جەلتوقساننان باستاپ مەنشىك يەسى وزگەردى.

«رەسپۋبليكا سارايى» ج ش س تاراتىلدى. ال قىزمەتكەرلەرى «الماتى  اۋەندەرi» مكقك جۇمىسقا تۇرادى.  

«مەنشىك ءتۇرى ج ش س بولعاننان گورى مەملەكەتتىك كوممۋنالدىق كاسىپورىن بولعان ءتيىمدى. ەندى قىزمەتكەرلەر جاپپاي اقىسى تولەنبەيتىن دەمالىسقا كەتپەيدى. تۇراقتى جۇمىس بولادى. 2017 جىلى ۇجىم 86 شارا ۇيىمداستىرعان. بۇل شارالاردىڭ بارلىعى وتە جوعارى دارەجەدە ءوتتى. سىزدەرگە ريزامىن»، - دەدى تاراتىلعان «رەسپۋبليكا سارايى» ج ش س ديرەكتورى  ارمان اسەنوۆ.

جيىندا قالالىق مادەنيەت باسقارماسى باسشىسىنىڭ ورىنباسارى دانيار الييەۆ ۇجىمعا جاڭا باسشىنى تانىستىردى. «رەسپۋبليكا سارايى «الماتى اۋەندەرى» مەكەمەسىنىڭ مەنشىگىنە وتەدى. ەندى كاسىپورىن باسشىسى باعدات تىلەگەنوۆ رەسپۋبليكا سارايىنىڭ جۇمىسىن باسقاراتىن بولدى»،- دەدى الييەۆ.

باعدات تىلەگەنوۆتىڭ ايتۋىنشا، ءقازىر رەسپۋبليكا سارايىندا 77 ادام جۇمىس ىستەپ كەلەدى.

«2018 جىلدىڭ قاڭتارىنان مەنىڭ اتىما جۇمىسقا تۇرۋ تۋرالى ارىز جازىڭىزدار. ورىنباسارلار قىسقاراتىن بولدى. تەك ءۇش ورىنباسار قالادى. ول ورىنعا كىمدەر قابىلداناتىنى بەلگىسىز. «الماتى  اۋەندەرi»  شىعارماشىلىق ۇجىمى بۇرىنعى رەجيمدە جۇمىس جاسايدى»،- دەدى «الماتى  اۋەندەرi» مكك ديرەكتورى باعدات تىلەگەنوۆ.

«الماتى  اۋەندەرi» مكقك قالانىڭ مادەنيەت جانە شىعارماشىلىق سالاسىندا وندىرىستىك شىعارماشىلىق قىزمەتىن جۇرگىزۋمەن، مادەنيەت جانە ونەر ادامدارىنا قولداۋ كورسەتۋمەن اينالىسادى.

ايتا كەتەيىك، رەسپۋبليكا سارايى - الماتى قالاسىندا ورنالاسقان مادەني ورتالىق عيمارات. 2008 جىلى 21 ناۋرىزدا «رەسپۋبليكالىق ماڭىزى بار تاريح، مادەنيەت، قالا قۇرىلىسى جانە ارحيتەركتۋرالىق ەسكەرتكىشى» مارتەبەسى بەرىلگەن. عيمارات 1970 جىلى ۆ.لەنيننىڭ 100 جىلدىعى قارساڭىندا اشىلىپ، كەڭەستىك كومپارتيا كوسەمىنىڭ ەسىمى بەرىلدى. مۇندا 1991 جىلى 10 جەلتوقساندا قازاقستان رەسپۋبليكاسىنىڭ تۇڭعىش سايلانعان پرەزيدەنتى ن.ءا.نازاربايەۆتىڭ قىزمەتىنە كىرىسۋىنە بايلانىستى ۇلىقتاۋ ءراسىمى ءوتتى. وسى جىلى عيماراتتىڭ اتاۋى «رەسپۋبليكا سارايى» دەپ وزگەرتىلدى.