استانا تورىندە «حان شاتىر» وسو-دا قازاقستان رەسپۋبليكاسىنىڭ تاۋەلسىزدىك كۇنىنە وراي «Batyrs’ Battle» مادەني-سپورتتىق جوباسىنىڭ تۇڭعىش ءتۋرنيرى تۇساۋىن كەستى دەپ حابارلايدى Qamshy.kz اقپارات اگەنتتىگى. قازاقتان شىققان الىپ كۇش يەلەرى قاجىمۇقان، بالۋان شولاق اتالارىمىزدىڭ جولىن قۋعان سەگىز بالۋان كۇش اتلەتيكاسى بويىنشا باسەكەگە ءتۇسىپ، ب ا ق سىناستى.

اتالعان دوداعا ەلىمىزدىڭ تۇكپىر-تۇكپىرىنەن كەلگەن سەگىز بالۋان ءباھادۇر، ەركىن، كوكجال، ماسكا، سۇڭقار، تاۋ تۇلعا، تولاعاي جانە شىمىر دەگەن لاقاپ اتتارمەن ونەر كورسەتتى. جارىسقا قاتىسۋشىلاردىڭ ەڭ جاسى كىشى 18 جاستاعى پاۆلودارلىق سۇڭقار بالۋان بولسا، ەڭ جاسى ۇلكەن 42 جاستاعى قاراعاندىلىق ەركىن باتىر بولدى.

سايىس ءتورت كەزەڭدى قامتىدى. اتاپ ايتساق:

1-كەزەڭ: سالماقتارى 60، 80 جانە 100 كەلى تارتاتىن قاپتاردى جىلدامدىققا كوتەرۋ؛

2-كەزەڭ:160 كەلى تاستى جىلدامدىققا كوتەرۋ؛

3-كەزەڭ:140 كەلى بورەنەمەن وتىرىپ تۇرۋ؛

4-كەزەڭ: سوم تەمىردى يۋ.

جارىس ەرەجەسى بويىنشا ءار كەزەڭدە تومەن ناتيجە كورسەتكەن 2 قاتىسۋشى تۋرنيردەن شەتتەتىلىپ وتىردى.

«بالۋانداردىڭ بارلىعى دا زور الىپ كۇش يەلەرى. قاجىمۇقان اتامىزدىڭ ناعىز ءىزباسارلارى دەسەك ارتىق بولمايدى. مىقتىلاردىڭ مىقتىسىن انىقتاۋ وڭاي بولمادى. اسىرەسە، قاتىسۋشىلاردىڭ كۇش-جىگەرلەرىمەن قاتار جىلدامدىقتارى دا باعالانعان 1، 2-كەزەڭدە ناتيجەلەردىڭ ايىرماشىلىعى سەكۋندتىڭ وندىق جانە جۇزدىك بولىكتەرىن قۇرادى. دەگەنمەن، بەتپەردە كيگەن شىمكەنتتىك بالۋان وزگەلەردەن باسىم ءتۇسىپ، جەڭىسكە جەتتى»، - دەيدى جوبانىڭ اتقارۋشى ديرەكتورى الماس قوجاحمەتوۆ.

جارىس قورىتىندىسى بويىنشا تۋرنير جەڭىمپازىنا 200 مىڭ تەڭگە  سوماسىندا اقشالاي جۇلدە تابىستالىپ، «Batyrs’ Battle» ارنايى كۋبوگى تارتۋ ەتىلدى. ال وزگە بالۋاندار استانا قالاسى اكىمدىگىنىڭ اتىنان تاعايىندالعان ەستەلىك مەدالدارمەن  جانە ديپلومدارمەن ماراپاتتالدى.

سونداي-اق، كەزەڭدەر اراسىنداعى ۇزىلىستە جاس سپورتشى، كينەس قازاقستان رەكوردتار كىتابىنىڭ رەكوردسمەنى امير ماحمەت شىنى بوتەلەكەلەردە كەۋدەسىن جەردەن كوتەرىپ، جينالعان قاۋىمدى ءوز ونەرىمەن ءتانتى ەتسە، «Batyrs’ Battle» جوباسىنىڭ اۆتورى، باس ۇيلەستىرۋشى سەرگەي سىرۋلنيكوۆ قاجىمۇقان اتامىزدىڭ ءبىرقاتار كۇش كورسەتىلىمدەرىن قايتالاپ، شارا كوركىن قىزدىرا ءتۇستى. سونىمەن قاتار، سالماعى 160 كەلىنى قۇرايتىن تاستى تىسىمەن كوتەرۋ ارقىلى جاڭا رەكورد ورناتىپ، كورەرمەندەردى تاڭ قالداردى.

«Batyrs’ Battle»، ياعني «باتىرلار شايقاسى» ەلىمىزدە ۇلتتىق ناقىشتاعى شوۋ ەلەمەنتتەردەن تۇراتىن كۇش اتلەتيكاسى بويىنشا سايىستاردى ۇيىمداستىرۋعا باعىتتالعان تۇڭعىش تەڭدەسسىز جوبا. جوبانىڭ باستى ميسسياسى سالاۋاتتى ءومىر سالتىن ناسيحاتتاپ، ەر كۇشىن سىندارلى دارىپتەۋدى قالىپتاستىرۋ جانە قولداۋ. مىڭداعان جىلدار بويى تاريح ەنشىسىندە قالىپ كەلگەن ۇلى دالا باتىرلارى مەن بالۋاندارىنىڭ كۇش سايىستارىن قايتا جاڭعىرتىپ، دارا سەرىلىك كودەكسىن تانىمال ەتۋ. وسىلايشا، «ماڭگىلىك ەل» جانە «رۋحاني جاڭعىرۋ» جالپىۇلتتىق باعدارلامالارىن ىسكە اسىرۋعا ۇلەس قوسۋ بولىپ تابىلادى.

«Batyrs’ Battle» ۇلتتىق قۇندىلىقتارىمىزدى دارىپتەۋگە باعىتتالعان جوبا. بۇل جارىستى ۇيىمداستىرۋ ارقىلى ەندىگى ۇمىتىلا باستاعان، جاس ۇرپاق تەك تاريح بەتتەرىنەن عانا وقىپ بىلە الاتىن وتكەن عاسىردا قازاقتىڭ اتىن الەمگە تانىتقان قاجىمۇقان سياقتى اتامىزدىڭ كۇش ونەرىن قايتا جاڭعىرتۋدى كوزدەدىك. بۇگىنگى دودا ءبىزدىڭ العاشقى قارلىعاشىمىز. كەلەشەكتە اتالعان ءتۋرنيردى وبلىس جانە رەسپۋبليكا كولەمىندە دە وتكىزۋدى جوسپارلاپ وتىرمىز»، - دەيدى جوبا جەتەكشىسى انۋار ماحمەتوۆ.