2018 جىلى قازاقستاننىڭ باتىسى مەن وڭتۇستىگىندەگى ءتورت وبلىستا گاز قىمباتتايدى. بۇل تۋرالى ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ، باسەكەلەستىك پەن تۇتىنۋشىلار قۇقىعىن قورعاۋ كوميتەتى مالىمدەدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.
«قازترانسگاز ايماق» اق 2018 جىلدىڭ 1 قاڭتارىنان باستاپ اقتوبە، جامبىل، باتىس قازاقستان جانە وڭتۇستىك قازاقستان وبلىستارىنىڭ تۇتىنۋشىلارى ءۇشىن تاۋارلىق گاز باعاسىن كوتەرۋ تۋرالى حابارلاما جىبەردى. باعانى قىمباتتاتۋدىڭ نەگىزگى سەبەبى - اقتوبە، جامبىل، باتىس قازاقستان جانە وڭتۇستىك قازاقستان وبلىستارىنداعى قوعامداستىقتىڭ گاز تاراتۋ جۇيەسى بويىنشا تاۋارلىق گازدى تاسىمالداۋ قىزمەتىنە تاريفتەردىڭ ق ر تابيعي مونوپوليالار تۋرالى زاڭناماسىنا سايكەس بەكىتىلگەن شەكتى دەڭگەيىنىڭ وزگەرۋى بولىپ وتىر. سونداي-اق شيكىزات پەن ماتەريال قۇنىنىڭ، وزگە ۇيىم قىزمەتتەرىنىڭ قىمباتتاۋى سىندى تاۋارلىق گازدى بولشەكتەپ ساتۋ بويىنشا قوعامداستىق شىعىندارى كوبەيىپ كەتكەن»، - دەلىنگەن كوميتەت ءتوراعاسىنىڭ ورىنباسارى اسان داربايەۆ قول قويعان حاتتا.
