قازاقستاندا 1 قاڭتاردان باستاپ سالىق سالۋ ماسەلەلەرى جونىندەگى تۇزەتۋلەر كۇشىنە ەندى، وعان سايكەس مىندەتتى الەۋمەتتىك مەديسينالىق ساقتاندىرۋدى ەنگىزۋ 2018 جىلدىڭ 1 قاڭتارىنان 2020 جىلعا اۋىستىرىلادى. 

 2017 جىلدىڭ 1 شىلدەسىنەن باستاپ اي سايىنعى جارنا جاساۋدى باستاعان جۇمىس بەرۋشىلەر ساقتاندىرۋ كەيىنگە قالدىرىلعانىنا قاراماستان، ءوز قىزمەتكەرلەرى ءۇشىن اقشا تولەۋدى جالعاستىرا بەرەدى. 2017 جىلى ولار قىزمەتكەر جالاقىسىنىڭ 1%-ىن تولەسە، بۇل سوما 2018 جانە 2019 جىلدارى 1،5%، 2020 جىلى 2%، 2022 جىلدان كەيىن 3%-عا ارتادى. سونىمەن بىرگە، ەگەر قىزمەتكەر جەڭىلدىك بەرىلگەن ساناتتاردىڭ بىرىنە كىرەتىن بولسا، اۋدارىم جاساۋدىڭ كەرەگى جوق. جەڭىلدىك ساناتىنداعى ازاماتتارعا مەملەكەت تولەم جاسايدى.

الەۋمەتتىك مەديسينالىق ساقتاندىرۋ قورىنىڭ باسشىسى ەلەنا باحمۋتوۆانىڭ ايتۋىنشا، سونىمەن بىرگە جۇمىس بەرۋشىلەر ءۇشىن مەملەكەتتىك الەۋمەتتىك ساقتاندىرۋ قورىنا اۋدارىمدار كولەمى 5%-دان 3،5%-عا تومەندەيدى. سايكەسىنشە، جۇمىس بەرۋشى قىزمەتكەر تابىسىنىڭ 1،5%-ى كولەمىندەگى ايىرمانى الەۋمەتتىك مەديسينالىق ساقتاندىرۋ قورىنا اۋدارادى.     

جەكە كاسىپكەرلەر، جەكە نوتاريۋستەر، ادۆوكاتتار مەن كاسىبي مەدياتورلار 2018 جانە 2019 جىلدارى وزدەرىنە جارنا تولەمەيدى. دەگەنمەن 2020 جىلدىڭ 1 قاڭتارىنان باستاپ ەكى ەڭ تومەنگى جالاقىنىڭ 5%-ىن تولەيدى. 

جۇمىس بەرۋشىلەر سەكىلدى ولار دا ءوز قىزمەتكەرلەرىنە 2017 جىلدىڭ 1 شىلدەسىنەن باستاپ اي سايىنعى جارنا جاساۋدى باستادى.   

ازاماتتىق-قۇقىقتىق سيپاتتاعى كەلىسىمشارت نەگىزىندە جۇمىس ىستەيتىن جەكە تۇلعالار 2020 جىلدىڭ 1 قاڭتارىنان باستاپ كەلىسىمشارت مەرزىمى ىشىندە اي سايىن تولەيدى. جارنا كولەمى 2020 جىلى كەلىسىمشارت بويىنشا الىنعان تابىستىڭ 1%-ىن، 2021 جىلى 2%-ىن قۇرايدى. 

جالدامالى قىزمەتكەرلەردىڭ تابىسىنان جارنانى جۇمىس بەرۋشىلەر ۇستاپ قالىپ، تولەيدى.  2017 جىلدىڭ 1 شىلدەسىنەن باستاپ جالدامالى قىزمەتكەرلەر ءۇشىن جۇمىس بەرۋشى اۋدارىم جاساپ كەلدى. سونىمەن قاتار، 2020 جىلدىڭ 1 قاڭتارىنان باستاپ جۇمىس بەرۋشى اي سايىن ولاردىڭ جالاقسىنان جارنا ۇستاپ قالىپ، الەۋمەتتىك مەديسينالىق ساقتاندىرۋ قورىنا اۋدارادى: ول 2020 جىلى جالاقىنىڭ 1%-ىن، 2021 جىلى 2%-ىن قۇرايدى. 

ەگەر ازامات جەڭىلدىك ساناتىنا جاتاتىن بولسا، وعان مەملەكەت تولەيدى. مەملەكەت 14 ساناتقا كىرەتىن ازاماتتاردى تەگىن ساقتاندىرادى: ولاردىڭ اراسىندا بالالار، جۇمىسسىزدار، جۇمىس ىستەمەيتىن جۇكتى ايەلدەر، ءۇش جاسقا دەيىنگى بالاسى بار جۇمىس ىستەمەيتىن تۇلعالار، مۇگەدەكتەر، جۇمىس ىستەمەيتىن ورالماندار بار.  

تۇراقتى جۇمىسى جوق جانە جەڭىلدىكتى ساناتقا كىرمەيتىن جەكە تۇلعالار 2020 جىلدىڭ 1 قاڭتارىنان باستاپ ءوزى ءۇشىن اي سايىن 1 ەڭ تومەنگى جالاقىنىڭ 5%-ى كولەمىندە جارنا تولەيدى.