فينليانديادا جەرگىلىكتى كومپانيالاردىڭ ءبىرى نانعا قارا شەگىرتكە قوسىپ دايىنداۋعا كوشتى، - دەپ جازادى Qamshy.kz اقپارات اگەنتتىگى حابار 24-كە سىلتەمە بەرىپ.

بىرلەستىك وكىلدەرىنىڭ ايتۋىنشا، ولار مۇنداي تاعامدى دايىنداۋدى الەمدە العاش رەت قولعا الىپ وتىر. ال ەرەكشە ناننىڭ ءار بولكەسىندە 70 كەپتىرىلگەن شەگىرتكە بار.

ولار الدىمەن ۇگىتىلىپ، سودان كەيىن ۇنعا بوكتىرىلەدى. مۇنداي نان پروتەينگە باي ءارى قۇرامىندا ءتۇرلى ۆيتاميندەر مەن تەمىر، كالسيي سياقتى ادام اعزاسىنا قاجەتتى ەلەمەنتتەر جەتەرلىك. ازىرگە ەرەكشە ناندى ەلدىڭ تەك ءىرى قالالارىنداعى دۇكەندەردەن الۋعا بولادى.

ءبىراق كەلەشەكتە جاپپاي ساۋداعا شىعارىلاتىن ءتۇرى بار. ال قۇنى ادەتتەگى بولكەدەن قىمباتتىراق، 4 ەۋرو تۇرادى. ايتا كەتەيىك، قازىرگى تاڭدا قارا شەگىرتكە ارالاسقان تاعامداردى ەۋرووداقتىڭ باسقا ەلدەرىنەن دە كەزدەستىرۋگە بولادى. مىسالى، شۆەسيادا وسى جاندىك قوسىلعان گامبۋرگەر ساتىلادى. قارا شەگىرتكەنى بەلگيا، ۇلىبريتانيا، دانيا، نيدەرلاند اسپازدارى دا پايدالانادى.

 – نان الۋ ءۇشىن ادامدار ءتىپتى سوناۋ 100 شاقىرىم جەردەن كەلەدى. ارينە بۇل نانعا كۇدىكپەن قارايتىندار دا بار. ولاردى تۇسىنۋگە بولادى. سەبەبى بۇل جاندىك قوسىلعان تاعام عوي، - دەدى Fazer كومپانياسىنىڭ وكىلى نوورا پويۋحونەن.

 – ءدامدى. ءوزىمىز الىپ جۇرگەن نانعا ۇقسايدى. كۇندەلىكتى دامنەن اسا قاتتى ايىرماشىلىعىن بايقاپ تۇرعانىم جوق، - دەيدى جەرگىلىكتى تۇرعىن.