سەمەيدە كوندۋكتور جولاۋشىنى اۆتوبۋستان قۋىپ شىقتى، - دەپ حابارلايدى Tengrinews.kz. وقيعانىڭ ۆيدەوسى الەۋمەتتىك جەلىدە تارالىپ كەتتى.  ۆيدەودا قىزدىڭ كوندۋكتوردى سوڭعى ايالداماعا دەيىن جەتكىزىپ تاستاۋدى سۇراپ تۇرعانىن كورۋگە بولادى. الايدا ايەل ادام "بىزدە وبەد" دەگەن جەلەۋمەن جولاۋشىنىڭ ءتۇسىپ قالۋىن تالاپ ەتكەن.  بۇعان نارازى بولعان سەمەي تۇرعىنى الەۋمەتتىك جەلىدە مۇنىڭ العاشقى وقيعا ەمەستىگىن جازىپ، قالا اكىمى ەرماك سالىموۆتەن شارا قولدانۋدى سۇرايدى.  بۇل جازباعا قاتىستى نارازى تۇرعىندار دا پىكىر ءبىلدىرىپ، 16 باعىتتاعى اۆتوبۋستاردىڭ راسىندا دا وسىنداي قيىندىقتارى بارىن راستادى. جەلى قولدانۋشىلارىنىڭ سوزىنشە، جۇرگىزۋشىلەر جولاۋشىلاردى سوڭعى ايالداماعا دەيىن اپارمايدى. 

بۇل وقيعانى بىلگەن تاسىمالداۋشى جۇرگىزۋشىمەن كەلىسىمشارتتى بۇزىپ، جولاۋشىعا دورەكى سويلەگەن كوندۋكتوردى جۇمىستان بوساتاتىنىن مالىمدەدى. "ساناتوريي" 16 باعىتتاعى اۆتوبۋستىڭ سوڭعى ايالداماسى ەمەس. الايدا بۇل جۇرگىزۋشى مەن كوندۋكتورعا ونداي قۇقىق بەرمەيدى - جولاۋشىلاردىڭ تالابى بويىنشا، ولار ادامداردى جەتكىزۋ كەرەك. سوندىقتان كىنامىزدى تولىق مويىندايمىز"، - دەيدى تاكسوموتورلى پارك باسشىسى.  ال قالا اكىمدىگىنىڭ وكىلدەرى تاسىمالداۋشىنىڭ ارەكەتىن باقىلاۋعا الاتىندارىن ايتادى. "جۇرگىزۋشىنىكى دۇرىس ەمەس. جەتكىزىپ تاستاپ، تۇسكى ۇزىلىسكە بارۋ كەرەك بولاتىن. تاسىمالداۋشىمەن كەلىسىم بار. ءقازىر اۋىزشا ايتتىق. ارى قاراي شارا قولدانۋ تۋرالى حات جولدايمىز"، - دەيدى جولاۋشىلار كولىگى مەن اۆتوجولدار ءبولىمىنىڭ وكىلدەرى.