"وتىرار" ارناسىنداعى «جاڭا كۇن» باعدارلاماسىنىڭ قوناعى الەۋمەتتىك تولەۋدى ۆەدوموستۆوارالىق ەسەپتەۋ ورتالىعىنىڭ وقو فيليالى ديرەكتورىنىڭ ورىنباسارى نەسىبەلى قاراجانوۆا قازاقستاندىقتاردىڭ زەينەت جاسىنا قاتىستى كوپتەگەن ماڭىزدى سۇراقتارعا جاۋاپ بەردى دەپ جازادى Qamshy.kz اقپارات اگەنتتىگى .
— جاڭا جىلدا بارلىق كورسەتكىشتەردىڭ وسۋىنە وراي زەينەتاقى، جاردەماقى تولەمدەرى قايتا يندەكستەلەدى. 2018 جىلدىڭ 1 قاڭتارىنان باستاپ زەينەتاقى تولەمدەرى 8 پايىزعا، قالعان بارلىق الەۋمەتتىك تولەمدەر 6 پايىزعا كوتەرىلدى. مەملەكەتتىك ساقتاندىرۋ قورىنان تولەنەتىن تولەمدەر 16 پايىزعا ءوستى. بىلتىر ەڭ تومەنگى زەينەتاقى كولەمى 28 148 تەڭگە بولسا، بيىل 33 745 تەڭگە بولدى. بازالىق زەينەتاقى بىلتىر 12 802 تەڭگە بولسا، 1 شىلدەدە 14 466، ەندى بيىلدان باستاپ 15 270 تەڭگەگە كوتەرىلىپ وتىر. بازالىق زەينەتاقى بىلتىر 45 مىڭ بولسا، 1 قاڭتاردان باستاپ 49 019 تەڭگەنى قۇرايدى. بۇل ەڭبەك زەينەتاقىسى مەن بازالىق زەينەتاقىنى قوسقانداعى ەڭ تومەنگى زەينەتاقى كورسەتكىشى. جۇمىس ىستەپ زەينەتاقى قورىنا اۋدارعان ازاماتتاردىكى 1 شىلدەدە 104 374 تەڭگە بولسا، ەندى 1 قاڭتاردان باستاپ ەڭ تومەنگى ايلىق كورسەتكىشتىڭ وسۋىنە (2 405 تەڭگە) بايلانىستى 111 مىڭ تەڭگەنىڭ ەسەبىنەن ەسەپتەلەدى. 1 قاڭتاردان باستاپ ايەل ازاماتشالاردىڭ جاسىنا بايلانىستى وزگەرىستەر بار. 1960 جىلى تۋىلعان ايەلدەر بولسا، بۇرىنعى زاڭ بويىنشا 58 جاستا زەينەتكەرلىككە شىقسا، ەندىگى زاڭ بويىنشا 58 جاس 6 ايدا شىعادى. بيىل 2018 جىلدان باستاپ ءار جىلدا 6 ايعا كوتەرىلەدى دە، 10 جىل اعىمىندا ەر كىسىلەرمەن قاتار زەينەتكەرلىككە 63 جاستا شىعاتىن بولادى. 53 جاستا زەينەتكەرلىككە شىعاتىن كوپ بالالى انالار، 1949 جانە 1963 جىل ارالىعىندا سەمەي پوليگونىندا كەمىندە 5 جىل تۇرعان ازاماتتار بولسا، ايەلدەر 45 جاستا، ەر كىسىلەر 50 جاستا زەينەتكەرلىككە شىعادى. ولارعا جاس كوتەرىلۋى قولدانىلمايدى.
— زەينەتاقىدان بولەك كوپبالالى وتباسىلارعا، بالا كۇتىمىنە بايلانىستى دەكرەتتىك دەمالىستا وتىرعان انالارعا قوسىمشا تولەم بولادى ما؟
— ايەل ازاماتشالار جۇمىس ىستەپ، ساقتاندىرۋ قورىنىڭ قاتىسۋشىسى بولسا جۇكتىلىگىنە جانە بوسانۋىنا بايلانىستى تولەنەدى. ءبىر جولعى جاردەماقى جۇمىس ىستەگەن، ىستەمەگەنىنە قاراماستان بەرىلەدى. 1 جاسقا دەيىنگى بالا كۇتىمىندە زەينەتاقىنىڭ 40 پايىز ەسەبىندە بەرىلەدى.
