امەريكالىق تۇرعىن فەيسبۋك الەۋمەتتىك جەلىسىندەگى تىكەلەي ەفير بارىسىندا وققا ۇشقان. بۇل تۋرالى WGN9 حابارلادى، دەپ جازادى Qamshy.kz اقپارات اگەنتتىگى.

وقيعا چيكاگودا، ۆاشينگتون ساياباعىنا تاياۋ ماڭدا ورىن العان. تەلەارنانىڭ مالىمەتىنە سۇيەنسەك، 27 جاستاعى امەريكالىق بويجەتكەن الەۋمەتتىك جەلىدە تىكەلەي ەفير جۇرگىزىپ كەلە جاتقان ۋاقىتتا جول بويىنداعى كولىكتە وتىرعان ايەلمەن سوزگە كەلىپ قالادى. جانجال بارىسىندا كولىكتە وتىرعان ايەل ەكىنشىسىنە وق اتادى. زارداپ شەگۋشىگە وق تيگەنىمەن تىكەلەي ەفيردى ۇزگەن جوق. كەيىن انىقتالعانداي، جانجالداسقان ەكى ايەل تانىس بولىپ شىقتى.

وق اتىلعان ءسات ۆيدەوعا تۇسپەگەن، الايدا قۇقىققورعاۋ ورگاندارى ەفيردىڭ راستىعىن مويىندادى. جەرگىلىكتى پوليسيا وق اتقان ايەلدى ىزدەستىرۋدە.

زارداپ شەگۋشى اۋرۋحانادا جاتىر، جاعدايى قالىپتى.