مي-جۇلىن، جۇيكە جۇيەسىنىڭ اۋرۋلارىن ەمدەيتىن ەۋروپاداعى قازاق دارىگەرى بۇگىنگى كۇنگە دەيىن 4 مىڭنان استام كۇردەلى وپەراسيا جاساپ ۇلگەرگەن. بۇل تۋرالى Qamshy.kz اقپارات اگەنتتىگى 24.kz-كە سىلتەمە بەرىپ حابارلايدى. مەديسينا عىلىمدارىنىڭ دوكتورى جادىك شەنولدىڭ ەسىمى گەرمانيادا كەڭ تارالعان. ءاليا، ءنايلا، رانا جانە مۇحامماد ءۇشىن جادىك شەنول قاراپايىم اكە بولسا، گەرمانيا قوعامى ءۇشىن بۇل ەسىمنىڭ اتاعى زور. جەتى ءتىلدى جەتىك بىلەتىن كيل ۋنيۆەرسيتەتى اۋرۋحاناسىنىڭ نەيروحيرۋرگى جادىك شەنول – قازاقستاندا كوپ بولماسا دا، انا ءتىلىن ۇمىتپاي، ۇلىقتاپ جۇرگەن ازاماتتاردىڭ ءبىرى. ءتىل عانا ەمەس، بىلىكتى قازاق ازاماتى – ادامنىڭ ەڭ كۇردەلى ءارى قۇدىرەتتى اعزاسى – مي جانە ميدىڭ سان ءتۇرلى تامىرىنا وتا جاسايتىن ەۋروپاداعى بىلىكتى بىرەگەي مامان. ول ازيا، امەريكا ەلدەرىنە دە ءجيى بارىپ، وسى سالاداعى تانىمىن تەرەڭدەتۋ جولىندا تىنىمسىز تەر توگىپ كەلەدى.

– نەيروحيرۋرگيادان باستالعان تاجىريبەمە 20 جىلعا جۋىق ۋاقىت بولدى. مەن بارلىعىن تىزبەكتەپ وتىرامىن. قازىرگە دەيىن 4 مىڭنان استام اۋرۋعا نەيروحيرۋرگيالىق وتا جاسادىم. ونىڭ ىشىندە ميدىڭ ىسىكتەرى، ميدىڭ تامىرىنداعى اۋرۋلار، ميعا قان قۇيىلعان جاعدايلاردا جاسايمىن. سونىمەن قاتار گيدروسەفاليادا، ياعني جۇلىنداعى اۋرۋلاردا دا وپەراسيا جاساعان كەزدەرىم كوپ-،دەيدى ول.

جات ەلدە دۇنيەگە كەلگەنىنە قاراماستان، دارىگەردىڭ ءتورت بالاسى دا قازاق ءتىلىن جەتىك بىلەدى ەكەن. ءتىلى نەمىسشە تازا، الايدا ءتۇرى مەن قويۋ قارا شاشىنا قاراپ، الەمنىڭ ءار تۇكپىرىندەگى ناۋقاستار «ۇلتىڭىز كىم؟»، – دەپ سۇرايدى ەكەن كەيدە. مۇنداي ساتتە دارىگەر «قازاقپىن»، – دەپ ماقتانىشپەن جاۋاپ بەرەتىنىن ايتادى.