وكپەسىز قازاق ەمەسپىز، ءبارىمىز دە نازىمىزدى، كىنامىزدى تاعا سالۋعا دايىنبىز. ارتىمنان ەرگەن ءىنىم ەدى ول مەنىڭ. ونەرگە نارىنقولدان ءوزىم جەتەلەپ كەلىپ، ءبىر اي جانىمدا الىپ ءجۇرىپ، دايارلاپ، ءوزىم وقىپ وقۋعا تۇسكەن مونولوگتى جاتتاتىپ، ينستيتۋتقا تۇسۋىنە سەپتىگىم ءتيىپ ەدى. اۋىلدا مەنىڭ انامنىڭ قولىندا بولدى، اكە-شەشەسىمەن انام وتە جاقسى ارالاستى. پەندەشىلىك وكپە ايتسام، مەنىكى دە ءبىر ەسەككە جۇك بولادى. ءتىپتى ۇستازىمىز تۇڭعىشباي اعامىز جايلى دا پىكىرىمىز ەكى بولەك. ءبىراق، قىزمەتتى بەرگەن مەن ەمەس، ونداي اۋىر جۇكتى ارقالاپ، اكەم تەاتردىڭ باسىنان ءسوز اسىرمايتىن تالاي ءدۇلدىلىنىڭ كوڭىلىن تاۋىپ، وتىز جىل بۇرىنعى اتاعىنىڭ بۋىمەن اۋىزدىعا ءسوز، اياقتىعا جول بەرمەي جۇرەتىن پاڭدارىنىڭ تىگىسىن جاتقىزىپ، عيماراتتىڭ ىستىق-سۋىعىن، وتىن-سۋىن تۇگەندەپ جۇرەتىن ازاپتى ونىڭ ءوزى دە قالاماعان شىعار.
وتىرىپ الىپ، شوق ۇرلەپ، "تۇڭعىشبايعا ءوستىپ ەدى، وزىنە دە سول كەرەك!" - دەگەندەر دە ءجۇر. ونى تۇڭعىشباي اعا كورسىن، ەستىسىن دەگەندەي ادەيى سىلتەمە جاساي ايتىپ جاتقانى دا بار. مەن دە سول تۇڭعىشبايدىڭ شاكىرتىمىن. ۇستازىمىز ءبىزدى بىرەۋدىڭ باسىنداعى بوقتى كورسەڭ بايبالام سال دەپ وقىتقان جوق. ونىڭ بويىنداعى تەكتىلىك، ءوشى كەتسە دە ورەكپي جونەلەتىن پەندەشىلىكتەن الىس، ونداي لاس پيعىلدان جوعارى. ۇستازىمىزدىڭ الىسار دۇشپانى ءسىز بەن ءبىزدىڭ دەڭگەيدە دە ەمەس!
ءتورت قۇبىلاڭ تەڭ تۇرعانداي، ونەر ادامىنىڭ بىرىنە ءسوز ەرسە، ورشەلەنە كەتكەندى قويۋ كەرەك قوي ەندى. پاراقوردى ونەردەن ىزدەگەنشە، ورگە قاراساڭدارشى. جەرىڭدى ساتىپ، بەنزينىڭدى قىمباتتاتقان، مۇنايىڭدى سىرتقا ساتىپ، تىلىڭە قاستىق جاساعان ونەرپاز ەمەس. "جىرتىق - تەسىككە كۇلىپتىنىڭ" كەرى بۇل.

اسقار نايمانتايەۆتىڭ Facebook-تاعى جەكە پاراقشاسىنان الىندى.