حالقىنىڭ سەنىمىن اقتاۋدى ارقالاپ، ءۇمىتىن موينىنا جۇكتەپ، ەلدىڭ مۇددەسى ءۇشىن جانىن پيدا ەتۋگە سەنىممەن سايلانعان بەلسەندى حالىق قالاۋلىسى ءارى قامقورشىسى دەپۋتات سىزدەر ەكەنى ايان.
قۇرمەتتى دەپۋتات مىرزالار، سىزدەرگە جاڭا جىلدىڭ جالىندى سالەمىن جولداپ، ەڭبەكتەرىڭىزدەن تابىس كۇتىپ، الەمنىڭ تىنىش بولۋىن تىلەپ، ەلىمىز امان، زامانىمىز جايلى، وسىپ-وركەندەپ، جەتىستىكتەرگە جەتە بەرۋىنە سەنىمدىلىك بىلدىرە وتىرىپ، تومەندەگى ەكى ماسەلە ورىندالا ما دەگەن اسىل ارمانىمدى جولداۋدامىن:
- مەملەكەت ءوز حالقىنىڭ دەنى ساۋ، تىرشىلىك ەتۋ دەڭگەيىن جاقسارتىپ، جىرعاۋلى، بەيبىت ءومىر سۇرگىزۋگە مىندەتتى. ال، بىزدە ايلىق جالاقىنىڭ تومەنگى جانە جوعارى دەڭگەيى جەر مەن كوكتەي ايىرماشىلىقتا بولعاندىقتان، باي-كەدەي تابىن ادەيى تۋعىزعاندايمىز.
دۇكەندەگى تاۋار مەن كوممۋنالدىق شىعىن قۇنى بارىنە ورتاق. ۇرپاقتىڭ تىلەۋى دە، تىلەگى دە بىردەي. بايشىكەشتىڭ بالاسى نە كيىپ، نە جەسە، كەدەيدىڭ دە بالاسى سونى الىپ بەر دەپ تىلەيدى. سوندىقتان، قاتاڭ باعا توقتاتىپ، ايلىق جالاقىنى 100 مىڭ تەڭگە مولشەرىندە بولعىزۋ ابزال. دەپۋتات مىرزالار، وزدەرىڭىز ۇلگى كورسەتىپ، سول ۇنەمدەلگەن قارجىعا بۇرىنعى قىسقارتىلعان اۋىل، اۋدان، وبلىستاردىڭ مارتەبەسىن قايتا بەرۋ – بۇگىنگى ءومىر تالابى. مىسالى، ءبىر ماسەلەمەن الماتىدان تالدىقورعانعا باراسىڭ. ول كۇنى جۇمىس بىتپەسە، قونۋعا تۋرا كەلەدى. جول قارجىسى، تاماق، ۋاقىت، قوناق ءۇيدىڭ قاراجاتى قالتاعا ءزابىرى بولارى حاق.
- دەپۋتاتتار مەن اكىم، اتقامىنەرلەردىڭ داياشىلىعىنا تىكۇشاق قولدانۋ تۋرالى جاڭا باستاما كوتەرىلۋدە. بۇل وركەنىمىزگە ءتاۋبا، قۋانارلىق جاي. مەنىڭشە، تىك ۇشاقتى اۋدان، وبلىستاردىڭ اكىمشىلىگى مەن اۋرۋحانا مەكەمەسىنە كەرەكتەنسە يگى. ناۋقاستى اۋدان، وبلىس اۋرۋحاناسىنا شۇعىل جەتكىزۋگە، سونداي-اق ءورت، ءقاۋىپ، ءارتۇرلى اپات كەزىندە قولدانىلسا ءتيىمدى بولار ەدى. ءدال وسى كەزدە اۋىلداردى جول، اۋىز سۋ، گازبەن قامتاماسىز ەتۋ اۋاداي قاجەت.
دەنساۋلىق پەن ءبىلىم بەرۋ جۇيەسىن تەگىن بولدىرۋ شارالارىن ۇيىمداستىرىپ، قولعا الىپ، جۇزەگە اسىرىلسا، حالىق قامى ءۇشىن زەينەتكە شىققاندا جانە قايتىس بولعاندا ءاربىر جانعا 3-12 اي زەينەتاقى ايلىق جالاقىسىن ءبىر رەتتىك كومەك رەتىندە بەرسە يگى ءىس بولار ەدى.
قوعام ادام ءۇشىن، ادام قوعام ءۇشىن دەگەن پيعىل توعىسقاندا عانا وركەن ورگە ءجۇزىپ، حالىقتىڭ تىرشىلىك ەتۋ دەڭگەيى جوعارىلاپ، ماڭگىلىك ەل بولارىمىز ايان، اعايىن!
ءۇرىمحان ۇلى وكەي
