ونەر ادامدارىنىڭ اراسىندا ءىستى بولىپ، سوتتالىپ، سوتتاسىپ جاتقاندار بار دەپ جازادى Today.kz. ماسەلەن، بۇگىن مۇحتار اۋەزوۆ اتىنداعى اكادەميالىق قازاق دراما تەاترىنىڭ ديرەكتورى ەرلان ءبىلال پارا الماق بولعان جەرىنەن ۇستالدى دەگەن اقپار تارادى.

"مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى الماتىدا جاڭا جىل كەزىندە بالالارعا قويىلىم قويۋ ماقساتىندا تەاتردان ورىن بەرۋ ءۇشىن زاڭدى تۇلعادان 1،5 ميلليون تەڭگە پارا الدى دەگەن كۇدىككە ءىلىندى. كىناسىن تولىق مويىنداۋىنا بايلانىستى ول قاماۋعا الىنعان جوق. سوتقا دەيىنگى تەرگەۋ شارالارى ءجۇرىپ جاتىر"، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى نۇرلان جاحين.

سوتتى بولعان ونەر ادامدارىنىڭ كوشىن باستاپ تۇرعان، ەل اراسىندا قىزۋ تالقىعا تۇسكەن جامانقۇلوۆ ءىسى بولدى. 2017 جىلى اكتەر تۇڭعىشباي جامانقۇلوۆ جەتەكشىلىك ەتكەن توپتىڭ "فەنيكس" فيلمىنە بولىنگەن بيۋدجەت قاراجاتىن يەمدەنگەنى بەلگىلى بولعان ەدى. 

سۋديا تاكەن شاكيروۆ "تۇڭعىشباي جامانقۇلوۆ 7 جىلعا باس بوستاندىعىنان ايىرىلسىن، 5 جىل مەملەكەتتىك قىزمەتتە ىستەۋگە تىيىم سالىنادى. راقىمشىلىققا بايلانىستى، جازا 3 جىل 6 ايعا قىسقارىپ، شارتتى تۇرگە اۋىستىرىلسىن"، - دەگەن ۇكىم شىعارعان بولاتىن.

2016 جىلى قازاقستاندىق سەريالداردىڭ اكتەرى نۇرجان تويلىبايەۆ ادام ءولتىرۋ ءىسى بويىنشا 11 جىلعا باس بوستاندىعىنان ايىرىلدى. 38 جاستاعى اكتەر بۇرىندارى زورلاۋ ءىسى بويىنشا جانە بۇزاقىلىق جاساعانى ءۇشىن سوتتالعان. نۇرجان تويلىبايەۆ "ماڭگى ەل"، "زاۋرە" جوبالارىنا قاتىسقان، سونىمەن قاتار "ايمان-شولپان" جانە "وگەي جۇرەك" سەريالدارىنا تۇسكەن.

وسىدان ءبىرشاما جىل بۇرىن تالانتتى ءانشى قايرات تۇنتەكوۆ تە ءىستى بولدى. ماس كۇيىندە رولگە وتىرىپ، جول اپاتىن جاساعانى ءۇشىن قايرات تۇنتەكوۆ اباقتىعا 40 كۇنگە قامالدى. ماتەريالدىق شىعىندى 7 ميلليونعا باعالاعان جابىرلەنۋشى تاراپ سومانىڭ بىردەن تولەنۋىن تالاپ ەتكەن بولاتىن.

ءىستى بولعان انشىلەردىڭ ءبىرى - بالقاشتىق ءانشى ستانيسلاۆ كيم. ول 2016 جىلى 14 جاستاعى قىزدى ءولتىردى دەگەن ايىپپەن 14 جىلعا سوتتالدى.

ايتا كەتەيىك، ءانشى قايرات نۇرتاستىڭ اناسى، پروديۋسەر گۇلزيرا ايداربەكوۆا دا سوت الدىندا جاۋاپ بەرگەن. 2014 جىلى جازدا جول اپاتىن تۋدىرعان پروديۋسەر كىنالى دەپ تانىلعان. سوت ايداربەكوۆانى قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 468-1 بابى، 468-بابىنىڭ 1-بولىگىمەن كىنالى دەپ تاۋىپ، وعان وسى باپتار بويىنشا 210 ايلىق ەسەپتىك كورسەتكىش مولشەرىندە ايىپپۇل تاعايىنداعان.

قازاقستاندىق سانگەر قۇرالاي ءنۇرقادىلوۆا دا سوت الدىندا تالاي بارعان. ول بىرنەشە بانكپەن سوتتاسىپ، جەڭىلىس تە تاپقان ەدى. ءنۇرقادىلوۆا 2006 جىلى بانكتەن نەسيە العانىن، ال بانكتىڭ 44 مىڭ دوللاردى زاڭسىز قوسىپ قويعانىن حابارلاعان. الايدا سوت بانكتەر تاراپىنا وڭ شەشىم شىعارىپ، زامانبەك ءنۇرقادىلوۆتىڭ قىزى قۇرالايدىڭ ءۇيىن تاركىلەدى.

ونەر ادامدارىنىڭ اراسىندا ءوزارا سوتتاسقاندارى دا بار. ماسەلەن، بەلگىلى ديزاينەر جادو ءانشى مەن مەرۋەرت تۇسىپبايەۆانىڭ داۋى سوتقا جەتىپ، قوعامدىق قىزۋ پىكىرتالاس تۋدىرعان ەدى. بۇل ماسەلەدە مەرۋەرت تۇسىپبايەۆا جادونىڭ كاسىبي ءبىلىمى بارىنا كۇماندانىپ، الەۋمەتتىك جەلى ارقىلى ونى سىنعا العان ەدى.

"ءبىز ءاربىر ايتقان سوزىمىزگە جاۋاپ بەرۋىمىز كەرەك. جادو مەن مەرۋەرت تۇسىپبايەۆا اراسىندا سوت وتىرىسى بولادى. مەرۋەرت تۇسىپبايەۆا جادونى وقىماعان دەپ سىناعان ەدى، ءبىز سوتتا ونىڭ ءبىلىمى بارىن دالەلدەيمىز" دەگەن ديزاينەردىڭ پروديۋسەرلىك ورتالىعى سوتقا دەيىن بارعان بولاتىن. 

 اقبوتا مۇسابەك قىزى