زەينەتكە شىعۋ ءۇشىن جەتكىلىكتى جيناقتالعان زەينەتاقى قاراجاتى ورتاشا ءومىر ءسۇرۋ ۇزاقتىعىنا بايلانىستى ەسەپتەلگەن. بۇل سۇراققا ق ر ەڭبەك جانە الەۋمەتتىك قورعاۋ مينيسترلىگى جاۋاپ بەردى، دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساي وتىرىپ.

«كەز كەلگەن قازاقستاندىق ازامات زەينەتاقى قورىن مەرزىمىنەن ەرتە الۋعا قۇقىلى. قوردىڭ جەتكىلىكتى مولشەرىن ەسەپتەۋدىڭ نەگىزگى كورسەتكىشتەرى ءاننۋيتتىڭ جاسى، ءومىر ءسۇرۋ ۇزاقتىعى جانە بولاشاق تولەمدەردى يندەكستەۋ بولىپ تابىلادى. 2018 جىلى زەينەتاقى قورىن مەرزىمىنەن الۋ ءۇشىن جينالعان قارجىنىڭ مولشەرى ايەلدەر ءۇشىن 50 جاستا 13 ميلليون 476 مىڭدى قۇراسا، ەر ادامدار ءۇشىن 55 جاستا 9 ميلليون 636 مىڭ تەڭگەنى قۇرايتىن بولادى. جيناقتالعان زەينەتاقى قاراجاتىنىڭ جەتكىلىكتى دەڭگەيىنىڭ ارتۋى ايەلدەردىڭ ەڭ تومەنگى زەينەتاقىسى مەن زەينەتكەرلىك جاسىنىڭ ۇلعايۋىمەن بايلانىستى. 2018 جىلدىڭ 1 قاڭتارىنان باستاپ ەڭ تومەنگى زەينەتاقى 33 مىڭ 745 تەڭگە بولادى»، - دەيدى مينيسترلىكتەگىلەر.

ايەل ادامداردىڭ جاسى ەر ادامداردىڭ جاس مولشەرىنەن كەم بولۋى قاجەتتىلىگىنە قاراماستان، ايەلدەردىڭ زەينەتاقى قورى ەر ادامدارعا قاراعاندا كوبىرەك بولۋى قاجەت ەكەن.

«زەينەتاقى قاراجاتىنىڭ جەتكىلىكتى بولۋ مولشەرى ەلىمىزدەگى ادامداردىڭ ءومىر ءسۇرۋ ۇزاقتىعىنا بايلانىستى. بۇل كريتەريي ايەل ادامدار ەر ادامدارعا قاراعاندا ۇزاق ءومىر سۇرەدى دەگەن ستاتيستيكاعا قاتىستى جاسالىنىپ وتىر»، - دەپ ءتۇسىندىردى مينيسترلىك وكىلدەرى.

الايدا جەتكىلىكتى زەينەتاقى قورىنىڭ مولشەرى جاس ۇلعايا كەلە وزگەرىپ وتىرادى. مينيسترلىكتىڭ حابارلاماسىندا كورسەتىلگەندەي، ادامنىڭ جاسى ۇلكەن بولسا، جەتكىلىكتى قاراجات مولشەرى سونشالىقتى تومەن بولادى.

ۆەدومستۆو مالىمەتىنە سايكەس، ءومىردى ساقتاندىرۋ كومپانياسى ادامداردىڭ زەينەتاقى قورىنىڭ قانشالىقتى تومەن بولعانىنا قاراماستان، ومىرلىك جەڭىلدىكتەر بەرەدى.

ايتا كەتەر بولساق، ق ر ەڭبەك جانە الەۋمەتتىك قورعاۋ ءمينيسترى تامارا دۇيسەنوۆا ەگەر ءاربىر قازاقستاندىق ازامات 23 جاسىنان باستاپ ايىنا 150 مىڭ تەڭگە جالاقى الاتىن بولسا، 45 جاسقا دەيىن ول 10 ميلليون تەڭگە كولەمىندە زەينەتاقى قورىنا قاراجات جيناي الاتىندىعىن مالىمدەگەن بولاتىن.