امان تاسىعان دەگەن ەسىمدى العاش جاقىن دوسىمنىڭ اۋىزىنان ەستىگەن ەدىم. ول وتە جاقسى پىكىرىن ءبىلدىردى. ونەرىمەن قوسا ەڭبەكقور ازامات ەكەنىن ايتىپ، العان بەتىنەن قايتپايتىن قايسار ازامات رەتىندە سۋرەتتەپ بەردى. ستۋدەنت بولىپ جۇرگەن ۋاقىتتا ۇستازدارىمىز دا «امان دەگەن جۋرناليست جىگىت بار عوي، سول بىزدە ءبىلىم العان»، دەپ ءبىزدى قىزىقتىرا وتىرىپ، وزدەرى ماقتانىپ قوياتىن ەدى. سودان بەرى امان تاسىعاننىڭ ءومىرىن، ونىڭ كاسىبي جولىن جالپى ادامي بولمىسىن باقىلاۋمەن بولدىم. قازاقى ۇياڭدىقتان بولار قاسىنا تۋرا بارىپ سويلەسۋگە قىسىلىپ، ونىمەن جاقىن ارالاساتىن، قاسىندا جۇرەتىن ادامدار ارقىلى كوپ اقپارات ەستىپ ءجۇردىم. سول ۋاقىتتاردا امان اعامىزدىڭ تاراپىنا بىردە-بىر جاعىمسىز پىكىر ايتىلعان ەمەس. ءبارىنىڭ ايتارى: «ول - قازاقتىڭ قامىن جەپ جۇرگەن ازامات جانە ءوز ءىسىنىڭ ناعىز مامانى»، دەگەن پىكىر بولدى. امان اعامىز جايلى پىكىردى تەك جۇرت اۋزىنان عانا ەستىپ قويعان جوقپىن، «قازاق راديوسىنان»، ودان بولەك كوگىلدىر ەكراننان بەرىلەتىن «كەشكى كەزدەسۋ» باعدارلاماسىنان دا ەستىپ تە، كورىپ تە كوزايىم بولىپ ءجۇردىم. قويشى، ءبىر سوزبەن ايتقاندا ءوزىمدى امان تاسىعان سياقتى بولۋعا تاربيەلەي باستادىم. ونىڭ بويىندا بار قاسيەتتەردى وزىمنەن ىزدەۋ دەگەن سياقتى پروسەسستەر باستالىپ كەتتى.

ەندىگى كەزەكتە، مەن وزگەلەرگە امان اعامىزدى جارنامالايتىن بولدىم. ونىڭ ىس-ارەكەتتەرىن ۇلگى رەتىندە، ءومىر تاجىريبەلەرىن مىسال رەتىندە الىپ قاتارلاستارىما اقىل ايتىپ تا جىبەرگەن كەزدەر بولدى. ءبىر سوزبەن ايتقاندا وسىنىڭ بارلىعى شىنايى ەدى. مەيلى امان اعامىزدى كۇنىگە كورىپ قاسىندا جۇرمەسەم دە سىرتتاي ادال ءىنىسى بولىپ باقتىم. الەۋمەتتىك جەلىگە سالعان ءاربىر اقپاراتىن قالدىرماي وقىپ، وزىندىك ءبىر وي ءتۇيىپ ءجۇردىم. ال ەندى مەن سياقتى امان اعامىزدى ۇلگى ەتىپ جۇرگەن قانشاما جاستار بار؟ ۋنيۆەرسيتەت قابىرعاسىندا وقىپ جۇرگەن، بولاشاقتا جۋرناليستيكا سالاسىنا بارۋدى ارماندايتىن ستۋدەنتتەردىڭ امان اعامىزعا ۇقساعىسى كەلەتىنىنە ءباس تىگە الامىن. ودان بولەك ماقساتىن ايقىنداپ، قالاعا كەلىپ اسقاق ارمانىنىڭ جولىنا تۇسكىسى كەلىپ جۇرگەن مەكتەپ وقۋشىلارى قانشاما؟ ولاردىڭ ءبارى امان اعامىزدىڭ اۋزىنان شىققان ءسوزى اڭدىپ وتىر. نە ايتسا سونى شىن، سونى دۇرىس دەپ قابىلداۋعا ءازىر. ال سوڭعى كۇندەرى امان اعامىزدىڭ تاراپىنا ايتىلىپ جاتقان جاعىمدى ەمەس پىكىرلەرگە امالسىز قوسىلامىن.

ەگەر ءبىزدىڭ حالقىمىزدىڭ قازىرگى رۋحاني جاعدايى مىقتى دەڭگەيدە بولىپ، ادامدىق پەن ادالدىقتىڭ شىڭىنا ءسال جەتپەي تۇرعان بولساق وندا مەن تۇسىنەر ەدىم. الايدا ءبىزدىڭ قازىرگى قوعامنىڭ جاعدايىن ءسىز وتە جاقسى بىلەسىز. اقىل ايتىپ، اس قايىرىپ، باتا بەرەتىن بىرەن ساراڭ قاريالارىمىز عانا قالدى. ولار كەتكەن سوڭ نە بولماق؟ تاربيەنىڭ نەگىزگى قاينار كوزى بولعان تەلەديدارىمىزدىڭ سىيقى اناۋ. وتباسىمەن وتىرىپ كورە المايتىن دارەجەگە جەتىپ تۇر. ەسىرگەن، ەسسىز ەسترادامىزدىڭ سىيقىن ايتپاساق تا تۇسىنىكتى. كىتاپ دەگەندى اتاۋىمەن ۇمىتقان ءبىزدىڭ جاستار ءقازىر ماڭگۇرتتەنىپ انا تىلىندە سويلەي المايتىن بولىپ بارا جاتىر. ال ءار بالانىڭ قولىندا جۇرەتىن ۇيالى تەلەفونداعى بىلىقتاردى ايتۋدىڭ دا قاجەتى جوق شىعار. ال وسىنىڭ بارلىعىنا باقىلاۋ جاسايتىن بيلىكتىڭ بىزبەن شارۋاسى دا بولىپ وتىرعان جوق. بۇل ءبىزدىڭ قوعامنىڭ مايدا ماسەلەلەرى عانا. ال ەندى وسىنداي الماعايىپ ۋاقىتتا، ءبارىمىزدىڭ ماقساتىمىز ەل مەن جەر بولۋى كەرەك ساتتە بىزگە «Talklike» اتتى بوقتىق ءسوز بەن ۇيات دۇنيەلەرگە تولى باعدارلامانىڭ قانشالىقتى قاجەتى بار دەپ ويلايسىز؟

سوندا ءبىزدىڭ ءوز وتانىمىزدى، سۇيىكتى قازاقستانىمىزدى شىنايى سۇيە الماعاندىعىمىز با؟ وسى كۇنگە دەيىن ايتىلىپ كەلگەن پاتريوتتىق سوزدەردىڭ ءبارى جالعان كوزبوياۋشىلىق پەن ەكىجۇزدىلىك بولعانى ما؟

امان اعا، ءسىزدىڭ دەڭگەيىڭىز حالىق الدىندا ونسىز دا جوعارى ەدى. ءسىز «Talklike»-تىڭ دەڭگەيىنە ءتۇسىپ كەتتىڭىز بە؟ جوق، بۇرىننان سول دەڭگەيدە جۇرگەن بە ەدىڭىز؟

سايلاۋحان ابىلاي