الماتىدا ۇلتتىق عىلىم اكادەمياسىنىڭ جانىنان «ۇلى دالا: تۇران وركەنيەتى» حالىقارالىق زەرتتەۋ ورتالىعى رەسمي اشىلۋى ءوتتى. ول تۇران ۋنيۆەرسيتەتىنىڭ بازاسىندا ورنالاسقان.

ۇعا مالىمەتىنە سايكەس، ورتالىقتىڭ نەگىزگى ماقساتى – حالىقارالىق زەرتتەۋ حابىن قالىپتاستىرۋ جانە حالىقارالىق اكادەميالىق كەڭىستىكتى قامتيتىن كوپدەڭگەيلى عىلىمي جەلىنىڭ ىرگەتاسىن قالاۋ. باستاما العاش رەت 2025 جىلدىڭ جەلتوقسانىندا اكادەميكتەرمەن وتكەن كەزدەسۋدە ۇسىنىلىپ، قىسقا ۋاقىت ىشىندە حالىقارالىق زەرتتەۋ ورتالىعىنا اينالعان.

فوتو: ۇعا
- عىلىمي ورتالىقتا «Turan Civilization Digital Atlas» پلاتفورماسى، سيفرلىق ارحيۆتەر مەن جاڭا ءبىلىم بەرۋ باعدارلامالارى ارقىلى GIS، جاساندى ينتەللەكت جانە ينتەراكتيۆتى كارتوگرافيانى گۋمانيتارلىق زەرتتەۋلەرگە ەنگىزۋ كوزدەلەدى، بۇل عىلىمي ناتيجەلەردىڭ كەڭ قولجەتىمدىلىگىن قامتاماسىز ەتەدى، - دەدى ق ر پرەزيدەنتىنىڭ جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ.

ق ر عىلىم جانە جوعارى ءبىلىم ءمينيسترى ساياسات نۇربەك «ۇلى دالا: تۇران وركەنيەتى» حالىقارالىق زەرتتەۋ ورتالىعىنىڭ قۇرىلۋى – ۇلى دالانى تۇتاس وركەنيەتتىك كەڭىستىك رەتىندە عىلىمي تۇرعىدان زەردەلەۋگە، ورتالىق ەۋرازيانىڭ تاريحي-مادەني مۇراسىن جاڭاشا پايىمداۋعا جانە زاماناۋي تەحنولوگيالاردى گۋمانيتارلىق زەرتتەۋلەرمەن ۇشتاستىرۋعا باعىتتالعان ماڭىزدى قادام ەكەنىن اتاپ ءوتتى.

ءىس-شاراعا قىرعىز رەسپۋبليكاسى، وزبەكستان، تۇرىكمەنستان، تۇركيانىڭ كونسۋلدارى مەن ديپلوماتيالىق وكىلدەرى، سونداي-اق حالىقارالىق ۇيىمداردىڭ وكىلدەرى، جوعارى وقۋ ورىندارى مەن عىلىمي ۇيىمداردىڭ باسشىلارى، اكادەميكتەر مەن جەتەكشى ساراپشىلار قاتىستى.

ەسكە سالايىق، الماتىدا جاقىن ۋاقىتتا بالالارعا ارنالعان العاشقى عىلىم مۋزەيى اشىلادى.