الماتىدا وسال ساناتتاعى جاسوسپىرىمدەر مەن جاستاردى قولداۋعا جانە الەۋمەتتەندىرۋگە باعىتتالعان «الەۋمەتتىك شەبەرحانا» جوباسى ىسكە قوسىلدى. بۇل تۋرالى قالالىق جاستار ساياساتى باسقارماسىنىڭ وكىلدەرى حابارلادى.

باعدارلاما اتا-انا قامقورلىعىنسىز قالعان جانە ومىرىندە قيىندىق بولىپ جاتقان جاستاردىڭ پراكتيكالىق داعدىسىن قالىپتاستىرىپ، ولاردىڭ جۇمىسپەن قامتىلۋ دەڭگەيىن ارتتىرۋعا باعىتتالعان.

قاتىسۋشىلار باريستا، اسپاز، شاشتاراز جانە موبيلوگراف سياقتى سۇرانىسقا يە ماماندىقتار بويىنشا قىسقا مەرزىمدى كۋرستاردان وتەدى.

بىلتىرعى جىلدىڭ قورىتىندىسى بويىنشا 120-دان استام ءجاسوسپىرىم وقۋدان ءوتتى. ولاردىڭ ەداۋىر بولىگى كۋرستاردى ءساتتى اياقتاپ، جۇمىسقا ورنالاستى.

بيىل جوبا اياسىندا وقىتۋ باعىتتارىن كەڭەيتىپ، قاتىسۋشىلار سانىن ارتتىرۋ جوسپارلانىپ وتىر. سونىمەن قاتار، قاتىسۋشىلارعا جۇمىسقا ورنالاسۋ، جوعارى وقۋ ورىندارى مەن كوللەدجدەرگە ءتۇسۋ كەزەڭدەرىندە قولداۋ كورسەتىلىپ، تالىمگەرلەرمەن جانە جۇمىس بەرۋشىلەرمەن ءوزارا بايلانىس ورناتىلادى.

باسقارما مالىمەتىنشە، بۇل باستاما جاستار ءۇشىن تەڭ مۇمكىندىك قالىپتاستىرۋعا جانە قالاداعى الەۋمەتتىك قولداۋ جۇيەسىن دامىتۋعا باعىتتالعان.