ق ر پرەزيدەنتى نۇرسۇلتان نازاربايەۆتىڭ قازاقستان حالقىنا ارنالعان «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا ادامي كاپيتالدى جاڭعىرتۋ نەگىزدەرىنە نازار اۋدارىلعان، دەپ جازادى Qamshy.kz اقپارات اگەنتتىگى. 

«ءبىلىم بەرۋدىڭ جاڭاساپاسى. بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت. ءبىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋعا ءتيىس. 2019 جىلدىڭ 1 قىركۇيەگىنە قاراي مەكتەپكە دەيىنگى ءبىلىم بەرۋ ىسىندە بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ ءبىرىڭعاي ستاندارتتارىن ەنگىزۋ قاجەت»، دەلىنگەن ەلباسى جولداۋىندا.

بۇدان بولەك، پرەزيدەنت ورتا ءبىلىم بەرۋ سالاسىندا جاڭارتىلعان مازمۇنعا كوشۋ باستالعانىن، بۇل 2021 جىلى اياقتالاتىنىن اتاپ ءوتتى.

«بۇل - مۇلدە جاڭا باعدارلامالار، وقۋلىقتار، ستاندارتتار جانە كادرلار. پەداگوگتاردى وقىتۋ جانە ولاردىڭ بىلىكتىلىگىن ارتتىرۋ جولدارىن قايتا قاراۋ كەرەك بولادى. ءبىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋ ساپاسىن كۇشەيتۋ كەرەك. بۇل - جاستاردى جاڭا تەحنولوگيالىق قالىپقا دايىنداۋدىڭ ماڭىزدى شارتى. ءبىلىم بەرۋ مەكەمەلەرىنىڭ اراسىنداعى باسەكەلەستىكتى ارتتىرىپ، جەكە كاپيتالدى تارتۋ ءۇشىن قالا مەكتەپتەرىندە جان باسىنا قاتىستى قارجىلاندىرۋ ەنگىزىلەتىن بولادى» دەلىنگەن جولداۋدا.