ق ر پرەزيدەنتى نۇرسۇلتان نازاربايەۆتىڭ قازاقستان حالقىنا ارنالعان «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا زەينەتاقى مەن جاردەماقىنىڭ نەشە پايىزعا وسەتىنىن ايتتى.

"مەملەكەت ءوزىنىڭ الەۋمەتتىك مىندەتتەمەلەرىنىڭ بارلىعىن تولىقتاي ورىندايدى. 2016-2017 جىلدارى زەينەتاقى مەن جاردەماقى ءۇش رەت كوبەيگەنىن ەسكە سالعىم كەلەدى. بازالىق زەينەتاقى، جالپى العاندا، 29 پروسەنتكە، ىنتىماقتى زەينەتاقى 32 پروسەنتكە، بالا تۋۋعا بايلانىستى جاردەماقى 37 پروسەنتكە، ال مۇگەدەكتەر مەن اسىراۋشىسىنان ايىرىلعاندارعا تولەنەتىن جاردەماقىنىڭ ءارقايسىسى 43 پروسەنتكە ءوستى.

دەنساۋلىق ساقتاۋ سالاسىنداعى قىزمەتكەرلەردىڭ جالاقىسى 28 پروسەنتكە دەيىن، ءبىلىم بەرۋ سالاسى قىزمەتكەرلەرىنىڭ جالاقىسى 29 پروسەنتكە دەيىن، الەۋمەتتىك قورعاۋ سالاسى قىزمەتكەرلەرىنىڭ جالاقىسى 40 پروسەنتكە دەيىن، «ب» كورپۋسىنداعى مەملەكەتتىك قىزمەتشىلەردىڭ جالاقىسى 30 پروسەنتكە، ستيپەنديالار 25 پروسەنتكە ءوستى.

داعدارىس زامانى. ايتسە دە، الەمنىڭ ساناۋلى عانا ەلدەرى الەۋمەتتىك سالاعا جۇمسايتىن شىعىندارىن وسىلاي ارتتىرا الدى.

رەسپۋبليكالىق بيۋدجەتتىڭ الەۋمەتتىك سالاعا بولىنگەن شىعىنى 2018 جىلى 12 پروسەنتكە ءوسىپ، 4،1 تريلليون تەڭگەدەن استى.

الەۋمەتتىك تولەمدەردى، سونىڭ ىشىندە زەينەتاقىنى ءوسىرۋ 3 ميلليوننان استام قازاقستاندىقتىڭ تابىستارىن كوبەيتەدى. 2018 جىلدىڭ 1 قاڭتارىنان باستاپ ىنتىماقتى زەينەتاقى 8 پروسەنتكە ارتتى. مۇگەدەكتەرگە، اسىراۋشىسىنان ايىرىلعان جانە مۇگەدەك بالالار تاربيەلەپ وتىرعان وتباسىلارىنا ارنالعان جاردەماقىلار 16 پروسەنتكە دەيىن ءوستى. 2018 جىلدىڭ 1 شىلدەسىنەن باستاپ بازالىق زەينەتاقى ەڭبەك وتىلىنە بايلانىستى ورتاشا العاندا 1،8 ەسە كوبەيەتىن بولادى. بۇدان بولەك، 2018 جىلدىڭ 1 شىلدەسىنەن باستاپ كامەلەتكە تولعان، بالا كەزىنەن ءبىرىنشى توپتاعى مۇگەدەكتەردى باعىپ وتىرعان اتا-انالار ءۇشىن قوسىمشا مەملەكەتتىك جاردەماقىنى ەنگىزۋدى تاپسىرامىن. ءبىر ەڭ تومەنگى كۇنكورىس دەڭگەيىنەن كەم ەمەس مۇنداي جاردەماقىنى شامامەن 14 مىڭ وتباسى اي سايىن الادى. 2018 جىلى وسى ماقساتقا 3 ميلليارد تەڭگەگە دەيىن قارجى قاجەت بولادى"، - دەلىنگەن جولداۋدا.