قىزدارى ورامال تاعىپ، حيدجاب كيەتىن اتا-انالار دەمەۋشى تاۋىپ، جەكە مەكتەپ اشا الادى. بۇل تۋرالى ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ.
وسى ورايدا مينيستر اقتوبەدە مەكتەپ ماڭىندا ناماز وقىعان ايەلدەردىڭ ارەكەتىنە قاتىستى تۇسىنىكتەمە بەردى. ايتۋىنشا، ولارمەن ءتۇسىندىرۋ جۇمىستارى جۇرگىزىلەدى.
«كەز كەلگەن جەردە ناماز وقۋ قۇراننىڭ دا، شاريعاتتىڭ دا تالاپتارىنا سايكەس كەلمەيدى. زاڭدا ءدىني راسىمدەر، قۇلشىلىق ەتۋ ارنايى ورىنداردا جاسالۋ كەرەكتىگى ايقىن كورسەتىلگەن. جالپى نورماتيۆتىك-قۇقىقتىق اكتىنى بۇزعانى ءۇشىن جاۋاپتى تۇلعالارعا 10-نان 20 اەك-كە دەيىن ايىپپۇل سالىنادى. ءبىراق اقتوبەدەگى 3-4 ايەلدىڭ جازالاناتىن-جازالانبايتىنىن ايتۋ قيىن. ءبىراق ولارمەن ءتۇسىندىرۋ جۇمىستارى جۇرگىزىلەدى. ءبىراق، مەنىڭ ويىمشا، كوشەدە ناماز وقۋ بۇل دۇرىس ەمەس»، — دەدى مينيستر.
