Qamshy.kz اقپارات اگەنتتىگىنىڭ ءتىلشىسى نازارلارىڭىزعا الەمدىك ساياساتتا بوي كورسەتىپ جۇرگەن سىمباتتى حانىمدار ءتىزىمىن ۇسىنادى.
يۆانكا ترامپ
اقش پرەزيدەنتى دونالد ترامپتىڭ تۇڭعىشى جانە اق ءۇيدىڭ كەڭەسشىسى يۆانكا ترامپ اكەسىنىڭ ەڭ سۇيىكتى پەرزەنتى. ول ترامپتىڭ ءبىرىنشى ايەلى يۆانادان تۋعان. يۆانكا بۇرىندارى سانبيكە بولۋمەن قاتار، تۆ شوۋلاردا بوي كورسەتكەن. قازىردە ءوزىنىڭ كاسىبىن دوڭگەلەتىپ وتىر. 36 جاستاعى پرەزيدەنت قىزى 2009 جىلى ميللياردەر دجەرەد كۋشنەرمەن شاڭىراق كوتەرگەن.
«ساياساتتان اۋلاق بولعىم كەلەدى» دەگەن مالىمدەمەسىنە قاراماستان، يۆانكا امەريكالىق پرەزيدەنتكە ساياسي شەشىمدەر قابىلداۋ كەزىندە ءوز پىكىرىن ءبىلدىرىپ وتىراتىندىعىن جاريا ەتتى.
ترامپ قىزىنىڭ قۇپيا بايلانىستارى جوقتىعىنان جانە وعان تولىقتاي سەنە الاتىندىعىنان، كوپتەگەن ماسەلەلەر جونىندە كەڭەسەدى. الايدا، يۆانكا مەن دونالد ترامپتىڭ پىكىرى ۇنەمى ءبىر جەردەن شىعا بەرمەيدى. ماسەلەن، Fox and Friends باسىلىمىنا بەرگەن سۇحباتىندا يۆانكا:
-مەن ساياساتتان بويىمدى اۋلاق ۇستاۋعا تىرىسامىن. اكەمنىڭ ساياسي تۇيسىگى تاڭعالارلىق. ول باسقالارى بىتىرە الاتىندىعىنا كۇماندانعان ىستەردى تىندىردى. ول بيلىككە كەلگەن ءبىرىنشى كۇننەن باستاپ، مەنىڭ دە وعان ارالاسقانىما قۋانامىن. ارينە، كوپ جاعدايدا اكەمنىڭ ويىمەن كەلىسە بەرمەيمىن جانە ءوزىمدى ساياسي قايراتكەر بولادى دەپ تە ەسەپتەمەيمىن،-دەگەن يۆانكا الەمدىك ساياساتتا بوي كورسەتىپ جۇرگەن سۇلۋ ايەلدەردىڭ ءبىرى.
مەلانيا ترامپ
سۇڭعاق بويلى، سىمباتتى امەريكانىڭ ءبىرىنشى حانىمى مەلانيا ترامپتىڭ بەس تىلدە (انا ءتىلى – سلوۆيان، اعىلشىن، فرانسۋز، سەرب جانە نەمىس) ەركىن سويلەي الاتىندىعىن كوپشىلىگى بىلە بەرمەيدى.
مەلانيا ون جىل شاماسىندا ءتۇرلى تانىمال ساندىك Vogue، Harper Bazaar، Ocean Drive، Avenue، InStyle جانە New York magazine باسىلىمداردىڭ باستى بەتتەرىنەن تۇسپەي كەلدى. ارينە، باس كەزدە ءسان جۋرنالدارىنا جالاڭاش تۇسكەن سۋرەتتەرى مەن ترامپتىڭ قاسىندا سايلاۋ ناۋقانىندا بولماۋى سىنالسا دا، قازىرگى كەزدە جۇرت ونى ءبىرىنشى حانىم رەتىندە قابىلدادى.
مەلانيانىڭ اكەسى اۆتوكولىك ساۋداسىمەن اينالىسقان، ال اناسى ءسان ديزاينەرى. قازىرگى كەزدە ءبىرىنشى حانىمنىڭ ءبىر ۇلى جانە ءتورت وگەي بالاسى بار.
ساياساتتا مەلانيا مەن يۆانكانىڭ كيىم كيۋ ۇلگىلەرى ەكى ءتۇرلى تاپتىڭ بەينەسىن ايقىندايدى. ماسەلەن، مەلانيا ترامپ كوپشىلىككە شابىت بەرگىسى كەلىپ، وتە قىبات Dolce & Gabbana، Ralph Lauren جانە Balmain سىندى قاراپايىم حالىقتىڭ قالتاسى كوتەرە بەرمەيتىن برەندتەردەن كيىنەدى. ال يۆانكا بولسا، ورتا تاپ وكىلدەرى تاڭدايتىن Zara سىندى ارزانىراق دۇكەندەردى قاناعات تۇتادى.
بريدجيت ماكرون
فرانسيا پرەزيدەنتى ەممانۋەل ماكروننىڭ جارى بريدجيت ماكرون ءبىرىنشى حانىم ءرولىن تەك بەيرەسمي تۇردە عانا اتقاراتىندىعىن ايتتى. بۇل شەشىم فرانسۋزداردىڭ جاڭا پرەزيدەنت ەممانۋەلدىڭ ايەلىن فرانسيانىڭ العاشقى رەسمي ءبىرىنشى حانىمى رەتىندە تانۋ تۋرالى جوسپارىنا قارسىلىعى ەسەپتى بولعان.
ونىڭ ۇستىنە فرانسيا بيلىگى ساياساتكەرلەردىڭ وتباسى مۇشەلەرىن جەمقورلىققا قارسى قوزعالىسقا قاتىستىرۋعا تىيىم سالۋ تۋرالى شەشىمىن شىعارعالى قاشان.
315 مىڭعا جۋىق فرانسيا تۇرعىنى ماكرون حانىمنىڭ ۇكىمەتتەن جالاقى الۋىنا قارسىلىقتارىن بىلدىرگەن پەتيسياعا قول قويدى. ال مەملەكەت ءوز كەزەگىندە بريدجيت حانىمنىڭ اتقاراتىن ىستەرىنە قانشا تولەنەتىندىگى جاريا ەتىلەتىندىگىن حابارلاعان.
وسى جاعدايدان كەيىن ورناعان تىنىشتىقتى بۇزعان بريدجيت ماكرون ءوزىن ءبىرىنشى حانىم رەتىندە سانامايتىندىعىن جانە بۇل ءرولدى تەك بەيرەسمي تۇردە عانا اتقاراتىندىعىن ايتتى. ال بۇرىنعى ءبىرىنشى حانىم، فرانسۋ وللاندتىڭ ايەلى ۆالەري تريەرۆەيلەرگە 2013 جىلى فرانسۋز بيۋدجەتىنەن €400،000 قارجى جۇمسالعان بولاتىن.
حايا بينت ال حۋسسەين
دۋباي شەيحى مۇحاممەدتىڭ ەكىنشى ايەلى حايا بينت ءال حۋسەين 1974 جىلى 3 مامىردا يوردانيا كورولى حۋسسەيننىڭ وتباسىندا دۇنيەگە كەلگەن. حايا انگياداعى دورسەتتەگى Bryanston School-دا جانە وكسفورد ۋنيۆەرسيتەتىنە قاتىستى قاسيەتتى حيلدا كوللەدجىن فيلوسوفيا، ساياسات جانە ەكونويكا سالالارىن ۇزدىك ءتامامداعان.
حانشايىم Tikyet Um Ali اتالاتىن يوردانياداعى اشتىقپەن كۇرەسەتىن گۋمانيتارلىق قوردى قۇردى. سونىمەن قاتار، ول اراب الەمى حالىقتارىنا گۋمانيتارلىق كومەك كورسەتەتىن Dubai's International Humanitarian City اتتى قوردى دا باسقارادى. 2007 جىلى شىلدەدە ول بۇۇ-عا تىنىشتىق ەلشىسى بولىپ تاعايىندالدى.
حانشايىم حايامەن بايلانىستى شۋلى وقيعالار دا از ەمەس، وعان قوسا ول ايەلدەردىڭ مۇمكىندىكتەرى كەڭ ەكەندىگىنە سەنەدى جانە ولاردىڭ ءباا ەكونوميكا، قوعام، سپورت، ونەر جانە ساياساتىندا ايتۋلى جەتىستىكتەرگە جەتۋى ءۇشىن قىزمەت ەتۋدە.
شەيحا موزا بينت ءناسىر
كاتاردىڭ بۇرىنعى ءامىرى ايەلىنىڭ بۇركەنىشىن شەشىپ قانا قويماي، ساياساتقا ارالاسۋىنا دا جول بەردى.
شەيحا موزا بينت ءناسىر – كاتاردىڭ بۇرىنعى ءامىرى شەيح حاماد بەن ءحاليفا-ال-تانيدىڭ ءۇش ايەلىنىڭ ەكىنشىسى. ول الەمدەگى ەڭ ءستيلدى ءبىرىنشى حانىمداردىڭ ءبىرى عانا ەمەس، قوعام قايراتكەرى جانە ساياساتكەر.
ورتالىق شىعىس ايەلدەرىنىڭ سۇلۋلىق سيمۆولىنا اينالىپ كەتكەن شەيحا موزا كاتار قاۋىمداستىعىنىڭ ءتوراعاسى.
موزانىڭ ءومىرىن ەكراندىق تۋىندى ەتسە، «عالامات عاسىر» سىندى تەلە حيكايا شىعار ەدى، ءبىراق سۇلتان سۇلەيمەننىڭ ورنىندا كاتار حانزاداسى حاماد، ال حيۋرەمنىڭ ورنىندا بەدەلدى كاتارلىق كاسىپكەردىڭ قىزى موزا بولار ەدى.
ماسەلەن، ءدال وسى موزانىڭ بەس بالاسىنىڭ ىشىندەگى ۇلى تاميم كاتار شەيحى حامادتىڭ ورنىنا بيلىككە كەلدى. بۇل موزانىڭ بەدەلىنە تاعى دا قوسىلعان ارتىقشىلىق دەسە دە بولادى. سەبەبى شەيح حامادتىڭ ءۇش ايەلىنەن جالپى العاندا جيىرما بالا-شاعاسى بار.
وعان قوسا موزا «Forbes» جۋرنالىنىڭ باعالاۋىنشا الەمدەگى ەڭ ىقپالدى 100 ايەلدىڭ قاتارىنا كىرەدى.
الينا كابايەۆا
2008 جىلدان بەرى ب ا ق بەتتەرىندە «رەسەي پرەزيدەنتى پۋتينمەن كوڭىل قوستى مىس» دەلىنگەن سپورتشى، الينا كابايەۆا الەم نازارىن وزىنە اۋدارعان ساياساتتاعى سۇلۋ كەلىنشەكتەردىڭ ءبىرى.
2004 جىلى الەم چەمپيونى اتاعىن يەلەنبەس بۇرىن كابايەۆا 18 جاسىندا ساياساتتا تانىلىپ، داۋىس بەرۋ قۇقىعىنا يەلەنىپ قانا قويماي، ءوزى دە سايلاۋعا تۇسكەن. ول 1983 جىلى تاشكەنتتە سپورتسمەندەر ليۋبوۆ جانە مارات كابايەۆتار وتباسىندا دۇنيەگە كەلگەن.
2005 جىلعا دەيىن الينا «ەدينايا روسسيا» پارتياسىنىڭ قۇرامىندا بولسا، ودان كەيىنگى جىلدارى رف-ڭ قوعامدىق پالاتاسىندا مەيىرىمدىلىك قورلارىنىڭ دامۋى مەن سپورتشىلاردى ساقتاندىرۋ ماسەلەلەرىمەن اينالىسقان. ول سپورتشىلاردى ساقتاندىرۋ جونىندەگى ءوزىنىڭ ۇستانىمىن اسقان جىگەرلىلىكپەن قورعاپ، مەملەكەتتىك دۋماعا دەيىن كوتەرىلدى.
الينا 2007 جىلى كوركەم گيمناست سپورتشىسىنان مەملەكەتتىك دۋما دەپۋتاتىنا اينالدى. ال 2014 جىلى ول ءوز بەتىمەن دۋماداعى لاۋازىمىن بوساتتى. وسى جىلدىڭ كۇزىندە «ۇلتتىق مەديا توپ» باسشىلارى كەڭەسىنىڭ ءتوراعاسى اتانسا، 2016 جىلدان باستاپ، «سپورت-ەكسپرەسس» باسشىلار كەڭەسىنىڭ ءتوراعاسى بولىپ وتىر.
مەحريبان الييەۆا
ازەربايجان پرەزيدەنتى يلحام الييەۆتىڭ ايەلى مەحريبان الييەۆا الەمدەگى ەڭ سۇلۋ ءبىرىنشى حانىمداردىڭ ءبىرى. پرەزيدەنت يلحام الييەۆتىڭ ونى «ازەربايجاننىڭ ءبىرىنشى ۆيسە-پرەزيدەنتى» دەپ اتاعانى كۇللى الەمدى دۇرلىكتىرگەن ەدى.
مەحريبان الييەۆا 1964 جىلى 26 تامىزدا باكۋدە ينتەلليگەنتتەر وتباسىندا دۇنيەگە كەلگەن. ونىڭ اكەسى اريف پاشايەۆ باكۋلىق ۇلتتىق اۆياسيا اكادەمياسىنىڭ رەكتورى، ال اناسى ايدا يمانكۋلييەۆا تانىمال فيلولوگ. مەحريبان جاستايىنان بىلىمگە قۇشتار بولىپ، مەكتەپتى التىن بەلگىمەن ءتامامداعان. 2005 جىلى ول فيلوسوفيا عىلىمدارى كانديداتتىعىن قورعادى.
53 جاستاعى سۇلۋ دا سىمباتتى ءازىربايجاننىڭ ءبىرىنشى حانىمى ءوز قىزىنان دا جاس كورىنەتىندىگى جونىندە ب ا ق بەتتەرىندە جازىلىپ ءجۇر. وزگەلەر ونىڭ سۇلۋلىعى باتىستىڭ قىمبات حيرۋرگيالىق وتالارىنىڭ ارقاسىندا ساقتالعان دەگەن پىكىردە.
مەحريبان الييەۆا مانساپ جولىن ءوزىنىڭ ماماندىعى بويىنشا، ماسكەۋ عىلىمي-زەرتتەۋ كوز ينستيتۋتىنىڭ قىزمەتشىسى بولىپ باستادى. 2002 جىلى مەحريبان ءازىربايجان گيمناستيكا فەدەراسياسىنىڭ پرەزيدەنتى رەتىندە سايلانىپ، ارتىنشا گايدار الييەۆ فوندىنىڭ پرەزيدەنتى اتاندى. 2005 جىلى پارلامەنتتە «جاڭا ءازىربايجان» پارتياسىنىڭ اتىنان ميللي ءماجىلىس دەپۋتاتى بولىپ قىزمەتكە كەلدى.
الييەۆا مانسابىنىڭ شارىقتاعان شەگى يلحام الييەۆتىڭ ونى ءازىربايجاننىڭ ءبىرىنشى ۆيسە-پرەزيدەنتى ەتىپ سايلاۋى بولدى.
داريعا نۇرسۇلتان قىزى نازاربايەۆا
قازاقستان پرەزيدەنتىنىڭ ۇلكەن قىزى داريعا نازاربايەۆا قوعام جانە مەملەكەت قايراتكەرى. 54 جاستاعى نازاربايەۆانىڭ ءبىلىمى جوعارى جانە ول قازاق، ورىس، اعىلشىن، يتاليان جانە ازداپ نەمىس ءتىلىن دە مەڭگەرگەن.
داريعا حانىمنىڭ مانساپ جولى وتە ۇزاق جانە كوپشىلىگى جاۋاپتى لاۋازىمدار. ماسەلەن، 2002-2006 جىلدارى - «نۇر وتان» پارتيا ءتوراعاسىنىڭ ورىنباسارى بولىپ تاعايىندالسا، 2012 جىلعى پارلامەنتتىك سايلاۋدان كەيىن ءماجىلىس دەپۋتاتى بولىپ سايلاندى. الەۋمەتتىك-مادەني كوميتەتىنىڭ ءتورايىمى قىزمەتىن دە اتقاردى.
ال 2015 جىلدىڭ 11 قىركۇيەگىنەن باستاپ، قازاقستان پرەمەر-مينيسترىنىڭ ورىنباسارى بولدى. 2016 جىلى ق ر پارلامەنت سەناتىنىڭ دەپۋتاتى بولىپ تاعايىندالدى. 2017 جىلى پارلامەنتى سەناتىنىڭ دەپۋتاتى داريعا نازاربايەۆا ق ر سىرتقى ىستەر مينيسترلىگى قىزمەتىنىڭ ماسەلەلەرى بويىنشا قوعامدىق كەڭەستىڭ جاڭا ءتورايىمى بولىپ سايلاندى
جەكە ومىرىنە كەلەر بولساق ول 1983 جىلى ول راحات الييەۆكە تۇرمىسقا شىققان. 1985 جىلى ول تۇڭعىش ۇلى ءنۇرالي الييەۆتى ومىرگە اكەلەدى. 1990 جىلى ايسۇلتان نازاربايەۆتى بوسانادى. ال 2000 جىلى ۆەنەرا ەسىمدى قىزدى بولادى.
داريعا نازاربايەۆا ساياسي قىزمەتپەن قوسا، مۋزىكامەن دە اينالىسقان.
پىكىر قالدىرۋ