قازاقستان پرەزيدەنتى نۇرسۇلتان نازاربايەۆ اقش-قا رەسمي ساپارى اياسىندا وسى ەلدىڭ بيزنەس جەتەكشىلەرىمەن كەزدەستى، دەپ Qamshy.kz اقپارات اگەنتتىگى ازاتتىققا سىلتەپ جازادى. 

اقوردا باسپا ءسوز قىزمەتىنىڭ حابارلاۋىنشا، ساپار اياسىندا ينۆەستيسيالىق جانە ساۋدا-ەكونوميكالىق ىنتىماقتاستىققا قاتىستى 7 ميلليارد دوللاردىڭ 20-دان استام كوممەرسيالىق قۇجاتىنا قول قويىلعان. بۇل قارجى اۆياسيا جانە عارىشتىق زەرتتەۋلەر، مۇناي حيمياسى مەن اۋىل شارۋاشىلىعى جانە ينفرا قۇرىلىمدى دامىتۋ سالالارىنداعى جوبالاردى ىسكە اسىرۋعا بولىنبەك.

سونىمەن قاتار ۇكىمەتارالىق ءۇش كەلىسىم جاسالعان. ولار – مەملەكەتتىك اۋە كەمەلەرىنە اەروناۆيگاسيالىق قىزمەت كورسەتكەنى ءۇشىن اقى الماۋ تۋرالى كەلىسىم، قازاقستان تەرريتورياسى ارقىلى كوممەرسيالىق تەمىرجول ءترانزيتىن قامتاماسىز ەتۋ كەلىسىمگە حاتتاما جانە حالىقارالىق سالىق ديسيپليناسىن جەتىلدىرۋ تۋرالى كەلىسىم.

رەسمي مالىمەت بويىنشا، كەزدەسۋدە نازاربايەۆ ساپار بارىسىندا قابىلدانعان ەكى جاقتى قارىم-قاتىناستى تۇتاستاي قامتيتىن كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەنىڭ ەرەكشە ءمانى بارىن ايتتى. ول قازاقستاندا مەملەكەتتىڭ بيزنەس جۇرگىزۋگە جاعداي جاساپ جاتقانىن، رەسپۋبليكانىڭ ترانسپورتتىق جانە ترانزيت الەۋەتى ارتا تۇسكەنىن جانە «استانا» حالىقارالىق قارجى ورتالىعىنىڭ جۇمىسىنا قاتىسۋشىلارعا ءبىرقاتار جەڭىلدىكتەر جاسالىپ وتىرعانىن ايتىپ، امەريكالىق بيزنەسمەندەردى قازاقستاندا بىرلەسكەن جوبالاردى ىسكە اسىرۋعا شاقىردى.

اقش ىسكەر توپ وكىلدەرى قازاقستانمەن ەكونوميكالىق ىنتىماقتاستى كەڭەيتۋگە مۇددەلى ەكەنىن بىلدىرگەن.

قازاقستان پرەزيدەنتىنىڭ اقش-قا رەسمي ساپارى 16 قاڭتار كۇنى باستالعان. كەشە نازاربايەۆ اق ۇيدە اقش پرەزيدەنتى دونالد ترامپپەن كەزدەسكەن.