الماتىداعى تاسىمالداۋشى  كومپانيالار قالا اكىمىنەن اۆتوبۋس پاركتەرىنىڭ شىعىندارىن جەڭىلدەتۋگە نەمەسە اۆتوبۋس پەن تروللەيبۋس جولاقىسىن 150 تەڭگەگە كوتەرۋدى سۇرادى دەپ حابارلايدى Qamshy.kz اقپارات اگەنتتىگى tengrinews.kz-كە سىلتەمە جاساپ. 

«قالاداعى جولاقىنى كوميسسيا 2017 جىلى ناۋرىزدا بەكىتكەن. بىزدە تاريف 72 تەڭگە، 10 پايىزىن تاسىمالداۋ حولدينگىنە بەرەمىز. ەلدىڭ كوپ ايماقتارىندا جول اقى 90 تەڭگەگە جەتتى (قوستانايدا اقپان ايىنان باستاپ جول اقى 100 تەڭگە)،  ال بىزدە ءالى كۇنگە دەيىن 80 تەڭگە. ءبىز الماتى قالاسى اكىمىنە حات جازدىق. وندا تاريفتەردى قايتا قاراۋدى جانە شىعىنداردى سۋبسيديالاۋدى تالاپ ەتتىك. ءبىز اسسوسياسيالاردىڭ بارلىق كاسىپورىندارعا تولىق كولەمدە سۋبسيديا تولەۋىن نەمەسە زاڭعا سايكەس جولاقىنىڭ وزگەرگەنىن قالايمىز. جولاقى 150 تەڭگەگە كوتەرىلمەسە، شىعىنعا باتامىز. تولىق سۋبسيديالانعان جاعدايدا تاريف 100-120 تەڭگەگە كوتەرىلەدى دەپ بولجاپ وتىرمىز. ءبىز جولاقىنىڭ قىمباتتاعانىن قالامايمىز. ءبىراق ول ءۇشىن تاسىمالداۋشى كومپانيالاردى قارجىلاندىرۋ كەرەك. ياعني سۋبسيديا ءبولىنۋى كەرەك»، - دەپ حابارلادى الماتى قالاسى جولاۋشىلاردى تاسىمالداۋ كاسىپورىندارىنىڭ اسسوسياسياسى.

«الەۋمەتتىك ماڭىزى بار باعىتتاردا اۆتوبۋس پاركتەرى كۇردەلى قارجىلىق قيىندىق كورىپ وتىر. بۇل اۆتوبۋستاردىڭ قىزمەت كورسەتۋىنىڭ توقتاۋىنا اكەلۋى مۇمكىن. وتكەن بەسجىلدىقتاعى تەڭگەنىڭ قۇنسىزدانۋىنا بايلانىستى تاسىمالداۋشى كومپانيالاردىڭ قىزمەت كورسەتۋ مەن جوندەۋ جۇمىستارىنا كەتكەن شىعىنى ايتارلىقتاي ءوستى، ءبىراق جولاقى 2012 جىلدان بەرى كوتەرىلمەدى»، - دەلىنگەن اۆتوپاركتىڭ قالا اكىمىنە جازعان وتىنىشىندە.