نۇرسۇلتان نازاربايەۆ اقش-تا «Nasdaq» كومپانياسىنىڭ پرەزيدەنتى ادينا فريدمانمەن، «Goldman Sachs» كومپانياسىنىڭ پرەزيدەنتى حارۆي شۆارسپەن، «ExxonMobil» كومپانياسىنىڭ باس اتقارۋشى ديرەكتورى داررەن ۆۋدسپەن كەزدەسۋلەر وتكىزدى، دەپ جازادى Qamshy.kz اقپارات اگەنتتىگى.

«Nasdaq» كومپانياسىنىڭ پرەزيدەنتىمەن كەزدەسۋى بارىسىندا كومپانيانىڭ قازاقستاندا جۇمىس جۇرگىزۋ جونىندەگى شەشىمىن قۇپتايتىنىن ايتتى.

– سىزدەردىڭ قازاقستاندا، «استانا» حالىقارالىق قارجى ورتالىعىندا جۇمىس ىستەۋ جونىندەگى شەشىمدەرىڭىزدى قولدايمىز. ءبىز كونستيتۋسياعا جانە ەلىمىزدىڭ ءبىرقاتار زاڭىنا وزگەرىستەر ەنگىزدىك. وندا اعىلشىن قۇقىعى ەنگىزىلگەن جانە قاتىسۋشىلاردىڭ بارلىعىنا جەڭىلدىكتەر قاراستىرىلعان. جۇمىس ىستەيتىندەر ءۇشىن بارلىق قولايلى جاعدايدى جاسايمىز، – دەدى قازاقستان پرەزيدەنتى.

ال كومپانيا پرەزيدەنتى ا.فريدمان قازاقستاننىڭ حالىقارالىق قارجى ورتالىعىن قۇرۋ جولىندا اتقارعان جۇمىستارىنان العان اسەرى جونىندە ايتتى. سونداي-اق «استانا» حالىقارالىق قارجى ورتالىعىمەن ىنتىماقتاستاستىقتى باستاۋعا جانە قازاقستان بيرجاسىنىڭ جۇمىسىنا قاجەتتى وزىق تەحنولوگيالارمەن قامتاماسىز ەتۋگە ءازىر ەكەنىن دە ايتتى.

«Goldman Sachs» كومپانياسىنىڭ پرەزيدەنتى حارۆي شۆارسپەن كەزدەسۋدە تاراپتار «استانا» حالىقارالىق قارجى ورتالىعى مەن «Goldman Sachs» كومپانياسىنىڭ ودان ءارى ىنتىماقتاسۋ ماسەلەلەرىن تالقىلادى.

نۇرسۇلتان نازاربايەۆ حالىقارالىق قارجى ورتالىعىن قۇرۋ ءۇشىن اتقارىلعان جۇمىستاردىڭ ناتيجەلەرىنە توقتالدى.

– بۇگىندە بارلىق قۇقىقتىق جاعداي جاسالدى. اعىلشىن قۇقىعى بازاسىنداعى سوت قۇرىلدى. قاتىسۋشىلار ءۇشىن قاجەتتى بارلىق جەڭىلدىكتەر قاراستىرىلدى، سونىڭ ىشىندە ۆيزا جانە سالىق جەڭىلدىكتەرى دە بار، – دەدى قازاقستان پرەزيدەنتى.

سونداي-اق، مەملەكەت باسشىسى «استانا» حالىقارالىق قارجى ورتالىعى امەريكانىڭ «Nasdaq» بيرجاسىمەن جانە شانحاي قور بيرجاسىمەن ىنتىماقتاستىق ورناتقانىن اتاپ ءوتتى.

«ExxonMobil» كومپانياسىنىڭ باس اتقارۋشى ديرەكتورى داررەن ۆۋدسپەن كەزدەسۋدە مەملەكەت باسشىسى قازاقستان مەن «ExxonMobil» كومپانياسى اراسىندا مۇناي-گاز سالاسىندا قالىپتاسقان ەكونوميكالىق سەرىكتەستىكتى ايرىقشا اتاپ ءوتتى.

نازاربايەۆ بۇل كومپانيانىڭ تەڭىز جانە قاشاعان مۇناي-گاز كەن ورىندارىن يگەرۋگە ارنالعان جوبالارعا اتسالىسىپ وتىرعانىن ايتتى.

د.ۆۋدس نۇرسۇلتان نازاربايەۆتى قازاقستاننىڭ بۇۇ قاۋىپسىزدىك كەڭەسىندەگى ءتوراعالىعىنىڭ باستالۋىمەن جانە اقش پرەزيدەنتى د.ترامپپەن وتكەن كەلىسسوزدەردىڭ تابىستى بولۋىمەن قۇتتىقتادى.