الماتىدا كولىكتى رەفورمالاۋ اياسىندا قوعامدىق كولىكتەردى جاڭارتۋ جۇرگىزىلىپ جاتىر. بۇگىن ەۆرو-5 ەكولوگيالىق ساناتىنداعى جاڭا اۆتوبۋستار №127 باعىت بويىنشا جولعا شىقتى، دەپ حابارلايدى Zakon.kz-كە سىلتەمە بەرىپ Qamshy.kz اقپارات اگەنتتىگى.

بۇرىن وسى باعىتتاعى اۆتوبۋستار ەسكى بولعاندىقتان جولاۋشىلار تاراپىنان ءجيى سىنعا ۇشىرايتىن.

بۇگىننەن باستاپ «قازاقفيلم» جانە قونايەۆ كوشەسى، رايىمبەك داڭعىلى بويىنشا كۇن سايىن 12 اۆتوبۋس قاتىنايدى، ينتەرۆالى - التى مينۋت. تومەن ەدەندى، ۇزىندىعى 9،5 مەترلىك اۆتوبۋستار ۆيدەوباقىلاۋ كامەرالارىمەن، كونديسيونەرلەرمەن، پاندۋستارمەن جانە جايلىلىق ءۇشىن قاجەتتى تاعى باسقالارىمەن جابدىقتالعان.

بولجام بويىنشا، بۇل باعىتتاعى جولاۋشى لەگى 7-دەن 9،5 مىڭ ادامعا دەيىن ارتادى دەپ كۇتىلۋدە.

بۇعان دەيىن الماتىدا №22، 70، 86، 65، 103، 50، 126، 112 باعىتتارى بويىنشا جاڭا اۆتوبۋستار جولعا شىققان ەدى. سونداي-اق №77 باعىت قايتا جاڭارىپ، №201 ماگيسترالدى باعىت جانە №1 باعىت اشىلدى. كورشى وبلىستان قالاعا قوسىلعان ەلدى مەكەندەردى جولاۋشىلار كولىگىمەن تولىق قامتۋ ءۇشىن قوسىمشا 10 باعىت اشىلدى.

جالپى، كولىكتى رەفورمالاۋ اياسىندا الماتىدا سىيىمدىلىعى ءارتۇرلى 388 اۆتوبۋس الىنعان ەدى. ولاردىڭ 230-ى جولدا ءجۇر، 160 جاڭا اۆتوبۋس اقپان ايىنىڭ سوڭىنا دەيىن كەزەڭمەن باعىتتارعا شىعادى. جەكە تاسىمالداۋشىلار دا 254 جاڭا اۆتوبۋس الدى، ولاردىڭ 91ء-ى قالا جولدارىندا قىزمەت كورسەتۋدە.