اقتوبە وبلىسىندا ورتەنگەن اۆتوبۋستاعى وزبەكستان ازاماتتارىنىڭ الدىن الا ءتىزىمى جاريالاندى. 18 قاڭتار كۇنى اقتوبە وبلىسىنىڭ ىرعىز اۋدانىندا ورتەنگەن جولاۋشىلار اۆتوبۋسىندا 52 وزبەك ازاماتى قازا تاپقان. ورتتەن بەس ادام – وزبەكستاننىڭ ەكى ازاماتى مەن وڭتۇستىك قازاقستان وبلىسىنىڭ ءۇش تۇرعىنى امان قالعان، دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى. 

وزبەكستان توتەنشە جاعدايلار مينيسترلىگىنىڭ حابارلاۋىنشا، ازىرگە الدىن الا 29 ادامنىڭ ءاتى-جونى انىقتالعان. مارقۇمداردىڭ بارلىعى 19-41 جاستاعى ەر ادام، نامانگان وبلىسىنىڭ تۇرعىندارى.

سونىمەن قاتار ورتتەن امان قالعان ەكى وزبەك ازاماتىنىڭ دا نامانگان وبلىسىنىڭ تۇرعىنى ەكەنى بەلگىلى بولعان.

اۆتوبۋس ءورتى قۇرباندارىنىڭ ءمايىتى 19 قاڭتارعا قاراعان ءتۇنى اقتوبەگە اكەلىنگەن. وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆتىڭ ايتۋىنشا، مۇردەلەر قاتتى كۇيىپ كەتكەندىكتەن، سىرتتاي قاراپ ولاردىڭ كىم ەكەنىن اجىراتۋ مۇمكىن ەمەس.

اقتوبە وبلىسى اكىمى باسپا ءسوز قىزمەتىنىڭ 19 قاڭتاردا حابارلاۋىنشا، قازاقستان مەن وزبەكستان ساراپشىلارى كۇنى-تۇنى سوت-مەديسينالىق ساراپتاما جۇمىستارىن جاساپ جاتىر.

امان قالعان بەس ادامنىڭ ءاتى-جونى كەشە جاريالانعان. ولاردىڭ اراسىندا وزبەكستاننىڭ ەكى ازاماتى - 1988 جىلى تۋعان احرور يسكاكوۆ پەن 1980 جىلى تۋعان يسرايلدجون مىرزاحمەدوۆ بار. قالعان ءۇش ادام - وڭتۇستىك قازاقستان وبلىسىنىڭ تۇرعىندارى - ماقسات پەرنەبكوۆ (1985 جىلى تۋعان)، بارات تاڭاتاروۆ (1978) جانە نۇرجان قىرعىزبايەۆ (1968).