اقتوبە وبلىسىندا اۆتوبۋستاعى ورتتەن مەرت بولعان وزبەكستاندىق 52 ازاماتتىڭ سۇيەگىن وزبەكستان توتەنشە جاعدايلار مينيسترلىگىنىڭ ارنايى ۇشاعى 19 قاڭتاردا استانا ۋاقىتىمەن ساعات 21 شاماسىندا اقتوبەدەن وزبەكستانعا الىپ كەتكەن. بۇل تۋرالى اقتوبە وبلىستىق اكىمدىگىنىڭ باسپا ءسوز قىزمەتى حابارلادى، دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى. 

اۆتوبۋستاعى ورتتەن 52 ادامنىڭ قازاعا ۇشىراۋىنا بايلانىستى قازاقستان قۇرعان ۇكىمەتتىك كوميسسيانىڭ مۇشەسى، قازاقستان ىشكى ىستەر ءمينيسترىنىڭ ورىنباسارى ەرلان تۇرعىمبايەۆ نەگىزگى بولجام بويىنشا، قايعىلى وقيعاعا ءورت قاۋىپسىزدىگى تالاپتارىن ساقتاماۋ سەبەپ بولعان دەپ حابارلاعان.

"ورتتەن ءتىرى قالعانداردىڭ ايتۋىنشا، قوزعالتقىشى ءوشىپ قالعان اۆتوبۋستا وتىرعاندار سۋىق سالوندى جىلىتۋ ءۇشىن ەكى ساعاتتان ارتىق ۋاقىت دانەكەرلەيتىن شام جاعىپ وتىرعان. كولىك ىشىندە بەس ليتر بەنزين قۇيىلعان پلاستماسسا ىدىس بولعاندىعى انىقتالدى. نەگىزگى بولجامعا سايكەس، شامنان بولىنگەن گاز بەن بەنزين قوسپاسى سالونعا تولعان. الگى ىدىستاعى بەنزين توگىلگەن كەزدە لەزدە وت تۇتانىپ، باس-اياعى بەس مينۋتتىڭ ىشىندە سالونداعى ادامدار ورتتەن مەرت بولعان" دەيدى ۆيسە-مينيستر.

ونىڭ سوزىنشە، وقيعا ورنىن ەكى تاۋلىك بويى زەرتتەگەن ماماندار اۆتوبۋستان قارۋ-جاراق، ءوق-دارى نەمەسە ولاردىڭ قالدىقتارى ءتارىزدى كۇماندى ەشتەڭە تاپپاعان. سونىمەن بىرگە ەرلان تۇرعىمبايەۆ قايعىلى وقيعاعا جول-كولىك وقيعاسى سەبەپ بولۋى مۇمكىن دەگەن بولجامدى دا جوققا شىعارعان.

دەنساۋلىق ساقتاۋ ۆيسە-مينيسترى الەكسەي سوي اۆتوبۋستاعى ورتتەن امان قالعان بەس ادام – ءۇش قازاقستاندىق جانە ەكى وزبەكستان ازاماتىنىڭ دەنساۋلىق جاعدايى جاقسى دەپ حابارلاعان. "زارداپ شەككەندەردىڭ دەنساۋلىعىنا ەشقانداي ءقاۋىپ ءتونىپ تۇرعان جوق. ولاردى اۋرۋحانادان شىعارۋعا بولادى" دەگەن ول. اقتوبەدەگى جەدەل جاردەم اۋرۋحاناسىنىڭ باس دارىگەرى راحىمجان ارىستان ورتتەن زارداپ شەگىپ، رەانيماسياعا جەتكىزىلگەن ەكى وزبەك ازاماتى جۇما كۇنى اۋرۋحانادان شىققانى تۋرالى حابارلادى.

ورتتەن امان قالعان ءۇش قازاقستاندىق ازىرشە جەدەل جاردەم اۋرۋحاناسىندا. تەرگەۋشىلەر قايعىلى وقيعاعا قاتىستى ولاردان جاۋاپ الىپ جاتىر.

قاڭتاردىڭ 18ء-ى كۇنى تاڭەرتەڭگى ساعات 10:30 شاماسىندا اقتوبە وبلىسىنىڭ ىرعىز اۋدانى قالىباي اۋىلىنان 10 كيلومەتر قاشىقتىقتا شىمكەنت - سامارا تاسجولىندا جولاۋشىلار اۆتوبۋسى ورتەنگەن. بيلىك ورىندارىنىڭ حابارلاۋىنشا، اۆتوبۋستا بارلىعى 57 ادام بولعان، ولاردىڭ 52ء-ى قازاعا ۇشىراعان. قۇربان بولعانداردىڭ بارلىعى – وزبەكستان ازاماتتارى. ءۇش جولاۋشى مەن ەكى جۇرگىزۋشى امان قالعان.