سۋىق انتيسيكلون الداعى ءۇش تاۋلىكتە قازاقستاننان كەتپەي، رەسپۋبليكانىڭ كوپتەگەن وبلىسىنا ورنىققان قاتتى اياز ءالى ساقتالادى. وتكەن تاۋلىكتەردە ورتالىق،  وڭتۇستىك-شىعىس جانە وڭتۇستىك وبلىستاردىڭ كەي جەرلەرىندە اۋا تەمپەراتۋراسى كليماتتىق نورمادان 3-8°س تومەن، ال سولتۇستىك پەن شىعىستا 10-18°س، قيىر شىعىستا نورمادان 20-23°C تومەن بولدى.

سول ۋاقىتتا رەسپۋبليكانىڭ باتىس وبلىستارىندا وڭتۇستىك-باتىس تروپوسفەرالىق اعىننىڭ اسەرىنەن، يران مەن قارا تەڭىز اۋداندارىنان جىلى اۋا كەلىپ، بۇل وسى جەرلەردە اۋا تەمپەراتۋراسىنىڭ نورمادان 3-5°س جوعارى كوتەرۋدە. 25-27 قاڭتاردا  باتىس پەن وڭتۇستىكتىڭ كەي جەرلەرىندە ەكپىنى  23-28 م/س تومەنگى بوران بولىپ، جەل سوعىپ،  200-500 مەترگە دەيىن كورۋدى ناشارلاتادى، دەپ جازادى Qamshy.kz اقپارات اگەنتتىگى قازگيدرومەت مالىمەتىنە سۇيەنىپ. 

قازاقستاننىڭ ءۇش وبلىسىندا، بولجاناتىن قاتتى جەلگە وراي، داۋىلدى ەسكەرتۋ جاريالاندى. قىزىلوردا وبلىسىندا 24 كۇندىز، 25-27 قاڭتاردا تاۋلىك بويى شىعىس، سولتۇستىك-شىعىس جەلى كەي جەرلەردە  18-23، كەي ۋاقىتتاردا ەكپىنى 30 م/س جانە ارتىق بولىپ ساقتالادى.

اقتوبە وبلىسىندا 24 كۇنى كۇندىز،  25 قاڭتاردا تاۋلىك بويى كەي جەرلەردە وڭتۇستىك-شىعىستان سوققان جەلدىڭ كۇشى 18-23 م/س، كەي ۋاقىتتاردا ەكپىنى 30 م/س جانە ودان اسا ساقتالادى.

وڭتۇستىك قازاقستان وبلىسىندا 25-27 قاڭتاردا كەي جەرلەردە سولتۇستىك-شىعىستان سوققان جەلدىڭ كۇشى 18-23، كەي ۋاقىتتاردا ەكپىنى 30 م/س جانە ودان اسا كۇتىلەدى.