شەتەلدە ءجۇرىپ ءوز كاسىبىن وركەندەتىپ وتىرعان قازاقستاندىقتار از ەمەس. Qamshy.kz اقپارات اگەنتتىگىنىڭ ءتىلشىسى سولاردىڭ ءبىر پاراسىن نازارلارىڭىزعا ۇسىنباق.

گاۋحار اسسيون

گاۋحار اسسيون فرانسيادا جەكەمەنشىك «Chez Mademoiselle» مەيرامحاناسىن اشقان. مەيرامحانانىڭ نارىقتا ءوز ورنىن ويىپ العانىنا سەگىز جىلدان استام ۋاقىت بولعان. باسىندا فرانسۋز تاعامدارىن ۇسىنعان گاۋحار ءقازىر ەۋروپالىقتارعا قازاقتىڭ ۇلتتىق اس ءمازىرىن تانىتىپ وتىر. «Chez Mademoiselle» مەيرامحاناسى – فرانسياداعى ەڭ ءىرى مەيرامحانانىڭ ءبىرى.

وسىدان 17 جىل بۇرىن قونىس اۋدارعان گاۋحار ەلىمىزدە زاڭگەر ماماندىعى بويىنشا ءبىلىم العان ەكەن.

نازيم پالتاشيەۆ

نازيم پالتاشيەۆ – اقش-تاعى «Soul of Nomad» ءسان ءۇيىنىڭ باسشىسى. نازيم 2016 جىلدان بەرى ءساندى كيىم تىگۋ نارىعىندا ءجۇر. «Soul of Nomad» ءسان ءۇيى Forbes جۋرنالىنىڭ ۇزدىك رەيتينگىنە كىرگەن.

نازيم الماتى قالاسىندا دۇنيگە كەلگەن. ەڭ قىزىعى، ونەركاسىپتىك ينجەنەر ماماندىعىن بىتىرگەن. وسى ماماندىعى ءوزىنىڭ برەندىن قالىپتاستىرۋعا كومەكتەسىپتى. نازيم 2012 جىلى الماتىداعى پاتەرىن ساتىپ، امەريكاعا كوشىپ كەتكەن. سودان كەيىن ءوزىنىڭ ءسان ءۇيىن اشۋعا بەل بۋعان.

سايدا تاۋكەليەۆا

سايدا تاۋكەليەۆا – گرۋزياداعى «MMA Georgia» مەن ارمەنياداعى «MMA Armenia» ساقتاندىرۋ كومپانياسىنىڭ باسشىسى. كومپانيانىڭ نارىققا شىققانىنا التى  جىلدان اسىپتى. سايدا قازاق مەملەكەتتىك  ۋنيۆەرسيتەتىنىڭ كاسىپكەرلىك قۇقىق فاكۋلتەتىندە العان ماماندىعىن وقىعان.

ناتاليا زاحاروۆا

ناتاليا زاحاروۆا قاراعاندى قالاسىندا تۋعان. سول قالاداعى اعىلشىن تىلىنە بەيىمدەلگەن №3 مەكتەپتى بىتىرگەن. يتاليادا جوعارى ءبىلىم العان.

ناتاليا – يتالياداعى بيزنەسى قابىلداۋ تۋروپەراتورى. ناقتىراق ايتساق، ول يتالياعا كەلگەندەرگە ەكسكۋرسيا جاساتىپ، قوناق ءۇي تاۋىپ بەرەدى. ناتاليانىڭ تۋريستىك كومپانياسى 2013 جىلدان بەرى نارىقتا كەلە جاتىر.

سالتانات مۇحتاروۆا

سالتانات مۇحتاروۆا – «گرۋزياداعى دەمالىس» تۋريزم اگەنتتىگىنىڭ نەگىزىن سالۋشى. ءتورت جىلدان بەرى وسى سالادا ەڭبەك ەتىپ كەلەدى.

سالتانات لومونوسوۆ اتىنداعى ماسكەۋ مەملكەتتىك ۋنيۆەرسيتەتىنىڭ گەوگرافيا فاكۋلتەتىندە وقىعان. بالا كۇنىندە ساياحاتتاۋدى ارمانداعان سالتانات بۇگىندە سول ارمانىنا قول جەتكىزدى.

سەرىكباي بيسەكەيەۆ

«ارمان» حولدينگىنىڭ پرەزيدەنتى. سەرىكباي بيسەكەيەۆ – رەسەيدەگى ەڭ بەلدى بيزنەسمەننىڭ ءبىرى. ول – تەك رەسەيدە عانا ەمەس، بۇكىل الەمدە باسەكەگە قابىلەتتى جوعارى تەحنولوگيالىق ءونىم شىعاراتىن ءىرى كورپوراسيا قۇرعان ازامات. سەرىكباي قوستاناي وبلىسىنداعى قامىستى اۋىلىندا دۇنيەگە كەلگەن.

سەرىكباي بيسەكەيەۆ «جىل كاسىپكەرى – 2012» حالىقارالىق بايقاۋىندا  رەسەيدەگى فيناليستەرى قاتارىنا كىرىپ، «ۆ2ۆ» نوميناسياسىندا ماراپاتقا يە بولدى.