«ءستاليننىڭ ءولىمى» اتتى كينوكارتينا ەلىمىزدە 25 قاڭتار بەيسەنبى كۇنى جارىق كورۋگە ءتيىس ەدى، دەپ جازادى Qamshy.kz اقپارات اگەنتتىگى Vlast.kz سايتىنىڭ مالىمەتىنە سۇيەنە وتىرىپ.

23 قاڭتاردا رەسەي فەدەراسياسىنىڭ مادەنيەت مينيسترلىگى 25 قاڭتاردا جارىققا شىعۋى ءتيىس بولعان «ءستاليننىڭ ءولىمى» كينوكارتيناسىنا بەرىلگەن كەسكىندەمە سەرتيفيكاتىن قايتارىپ الدى. اتالمىش ۇيىمنىڭ زاڭگەرلەرى بۇل كومەديانىڭ ەشقانداي دا تاريحي، مادەني قۇندىلىعى جوق جانە دە بۇل فيلمدە كەڭەستىك رامىزدەر – ءانۇران، مەدالدار مەن بۇيرىقتار – قورلانعان دەگەن شەشىمگە كەلدى.

جەرگىلىكتى تىلشىلەر رەسەيلىك «ۆولگا» كومپانياسىنا «قازاقستاندىقتار بۇل ءفيلمدى كورە الادى ما؟» دەگەن ساۋال جولداعان بولاتىن. بەلگىلى بولعانداي، «ءستاليننىڭ ءولىمى» كينوكارتيناسى ءبىزدىڭ ەلىمىزدە دە كورسەتىلمەيتىن بولدى، سەبەبى بۇل فيلمنەن بارلىق كينوتەاترلار باس تارتقان ەكەن. بۇل جايىندا «ۆولگا» كومپانياسىنىڭ وكىلى يۋليا فاتەيەۆا مالىمدەدى.

دەرەكتەرگە سايكەس، بۇل ءفيلمدى ءبىر كينوسەت پەن ءبىر مۋلتيپلەكس قابىلداۋعا كەلىسىم بىلدىرگەن بولاتىن، الايدا ولار دا كەيىننەن رايىنان قايتىپتى.

 «ءستاليننىڭ ءولىمى» كينوكارتيناسى 2010 جىلى جارىق كورگەن كوميكس كىتاپتىڭ ەكراندىق نۇسقاسى بولىپ تابىلادى. فيلمدە ءستاليننىڭ ومىرىندەگى سوڭعى ساعاتتار جانە ونىڭ بيلىك ءۇشىن قالاي كۇرەسكەندىگى جايلى كورسەتىلەدى. بۇل كينودا ستيۆ بۋشەمي، دجەيسون ايزەكس، ولگا كۋريلەنكو، دجەففري تەمبور اتتى ارتىستەر ويناعان. اقش-تا بۇل فيلم ناۋرىز ايىندا كورسەتىلەتىن بولادى. ال قازاقستاندا «ءستاليننىڭ ءولىمى» كينوكارتيناسى رەسەيمەن بىردەي ۋاقىتتا كورسەتىلۋى ءتيىس بولاتىن. Rotten Tomatoes سايتى بۇل فيلمگە 97% جاقسى دەگەن رەيتينگ بەرىپ، ورتاشا 8،3/10 دەگەن باللمەن باعالاعان.

ايتا كەتەرلىك جايت، رەسەيدە داۋ تۋدىرعان كينوكارتينالار قازاقستاندا دا جارىققا شىقپاي قالعان بۇل ءبىرىنشى جاعداي ەمەس. 2015 جىلى «ينتەرۆيۋ» جانە «نومەر 44» اتتى كينولار ءدال وسىنداي سەبەپتەرمەن پروكاتتان الىنىپ تاستالعان بولاتىن.