ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتىس توڭىرەگىندەگى تۇيتكىلدى ساۋالدارعا جاۋاپ بەردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

بۇگىن ۇكىمەت ۇيىندە وتكەن باسپا ءسوز ءماسليحاتى بارىسىندا ب ا ق وكىلدەرى مينيستردەن: «16 وبلىستا ايتىس وتكىزىلدى. ال سونىڭ جەڭىمپازدارىمەن «التىن دومبىرا» ايتىسى نەلىكتەن وتپەي قالدى؟ ءجۇرسىن ەرماندار نەگە باسقا ايتىس وتكىزدى؟ وسىعان قاراعاندا ايتىس ەكىگە بولىنگەنى مە؟»، - دەپ سۇراعان ەدى.

«ارينە، ايتىس ءبىزدىڭ ءتول ءداستۇرىمىز. قازىرگى كەزدە قازاقستاندا كەڭىنەن دامىپ كەلە جاتىر. ايتىس  جەكەلەگەن تۇلعالاردىڭ مەنشىكتەپ العان كاسىبى ەمەس. ول بۇكىل حالىقتىڭ،  قازاق حالقىنىڭ رۋحاني بايلىعى. سول سەبەپتى  ءبىز ءقازىر ايتىستى ايماقتاردا ۇيىمداستىرامىز. ماسەلەن، اقتوبەدە، ەلىمىزدىڭ باسقا دا ايماقتارىندا ءوتتى»،-  دەدى ول.

ونىڭ ايتۋىنشا، جەرگىلىكتى اكىمدىكتەر ايتىس قازىلار القاسىنىڭ ءتوراعاسى كىم بولاتىندىعىن، القاعا مۇشە بولىپ كىمدەر شاقىرىلاتىندىعىن شەشىپ، ونى مينيسترلىكپەن كەلىسەدى. جالپى، قازىلار القاسىن بەلگىلەۋدىڭ ارنايى ەرەجەسى  دە بار.

«ال ءجۇرسىن ەرمانعا كەلسەك، ءبىز ول كىسىگە ۇلكەن قۇرمەتپەن  قارايمىز. وزدەرىڭىز بىلەسىزدەر، ول كىسى جەلتوقساننىڭ 28-29-ىندا  الماتىدا ايتىس وتكىزدى. سول كەزدە حابارلاسىپ، مينيسترلىكتەن قانداي كومەك كەرەكتىگىن  سۇرادىق. بىلايشا ايتقاندا ول كىسىمەن بىرگە ايتىسقا قاتىستى جۇمىس ىستەۋگە ۇلكەن جوسپارىمىز بار»، - دەدى مينيستر.

ونىڭ ايتۋىنشا، اقتوبەدەگى ايتىسقا ەلىمىزدىڭ 16 وڭىرىندە ۇيىمداستىرىلعان ايتىستىڭ جەڭىمپازدارى قاتىسقان.

«ايتىس وتە جوعارى دەڭگەيدە ءوتتى. تەلەديداردان دا كورسەتىلدى»، - دەدى ول.