الماتى وبلىسىندا كاسىپكەرگە ءتيىستى مەملەكەتتىك قىزمەت كورسەتپەگەن شەنەۋنىكتەر سوگىس الدى. كاسىپكەر جەر ۋچاسكەسىنىڭ نىسانالى ماقساتىن وزگەرتپەك بولعان.

2017 جىلدىڭ قىركۇيەگىندە كاسىپكەر الماتى وبلىسى جامبىل اۋدانىنىڭ اكىمىنە جەر ۋچاسكەسىنىڭ نىسانالى ماقساتىن وزگەرتۋ بويىنشا ءوتىنىش بەرگەن. الايدا جەرگىلىكتى اتقارۋشى ورگان جەر كودەكسىنىڭ 97 بابى 3-تارماعىنا سىلتەمە جاساپ، ازاماتتىڭ ارىزىن قابىلداماي قويعان، دەپ جازادى Qamshy.kz اقپارات اگەنتتىگى الماتى وبلىسى كاسىپىكەرلەر پالاتاسىنىڭ باسپا ءسوز قىزمەتىنە سىلتەمە جاساپ.

كاسىپكەر وڭىرلىك كاسىپكەرلەر پالاتاسىنا جۇگىنگەننەن كەيىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىنىڭ دەپارتامەنتىنە جەر قاتىناستارى ءبولىمىنىڭ قىزمەتىنە تەكسەرۋ جۇرگىزۋ جونىندە حات جولداندى.

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتىنىڭ اقپاراتىنشا، مەملەكەتتىك قىزمەتتى نەگىزسىز تۇردە كورسەتپەۋ جاعدايى انىقتالماعان. الايدا الماتى وبلىسى جامبىل اۋدانىنىڭ جەر قاتىناستارى ءبولىمى مەن اكىمدىك اپپاراتىنىڭ قىزمەتكەرلەرى تاراپىنان مەملەكەتتىك قىزمەت كورسەتۋ پروسەدۋراسىندا بۇزۋشىلىق فاكتىسى ورىن العان.

«جەر ۋچاسكەسىنىڭ نىسانالى ماقساتىن وزگەرتۋ بويىنشا شەشىمدى بەرۋ» مەملەكەتتىك قىزمەتىن كورسەتۋ ناتيجەسى بويىنشا بۇزۋشىلىق فاكتىسى انىقتالدى. مەملەكەتتىك قىزمەت ستاندارتىنىڭ 3-تارماعى بويىنشا مەملەكەتتىك قىزمەت وبلىستاردىڭ، استانا جانە الماتى قالالارىنىڭ، وبلىستىق ماڭىزى بار اۋداندار مەن قالالاردىڭ اتقارۋشى ورگاندارىمەن، اۋداندىق ماڭىزى بار قالالاردىڭ، پوسەلكەلەردىڭ، اۋىلداردىڭ، اۋىلدىق وكرۋگتەردىڭ اكىمدەرىمەن كورسەتىلەدى. قۇجاتتاردى قابىلداۋ جانە مەملەكەتتىك قىزمەتتىڭ ناتيجەلەرىن بەرۋ قىزمەت كورسەتۋشىنىڭ كەڭسەسى، ياعني جەرگىلىكتى اتقارۋشى ورگان ارقىلى جۇزەگە اسىرىلادى»، - دەلىنگەن مەملەكەتتىك ورگان جاۋابىندا.

كاسىپكەرلەر پالاتاسىنىڭ كاسىپكەرلەردىڭ قۇقىعىن قورعاۋ جانە اكىمشىلىك كەدەرگىلەردى ازايتۋ جونىندەگى ءبولىمنىڭ ساراپشىسى دۋمان كەرىمبايەۆتىڭ ءسوزىنش،ە اكىم اتىنا جازىلعان وتىنىشكە جەر قاتىناستارى بولىمىنەن جاۋاپ قايتارىلعان. جەر كودەكسىنىڭ تالاپتارى بويىنشا ۋچاسكەنىڭ نىسانالى ماقساتىن وزگەرتۋ بويىنشا تەرىس نەمەسە وڭ شەشىم شىعارۋ بويىنشا جاۋاپ جەرگىلىكتى اتقارۋشى ورگان، ياعني اكىم تاراپىنان بەرىلۋى ءتيىس.

اتالعان سەبەپتەر بويىنشا وتكەن جىلدىڭ 7 قاراشاسىندا جامبىل اۋدانى اكىمىنىڭ وكىمىمەن جۇمىستا جىبەرىلگەن كەمشىلىكتەر بويىنشا جەر قاتىناستارى ءبولىمىنىڭ باسشىسىنا جانە اكىم اپپاراتىنىڭ باس مامانىنا سوگىس جاريالاندى.