وسىدان ءتورت كۇن بۇرىن جامبىل وبلىسىنداعى 21450 اسكەري بولىمىنەن 18 جاستاعى سارباز جوعالىپ  كەتكەن، دەپ حابارلايدى Qamshy.kz اقپارات اگەنتتىگى mgorod.kz سايتىنا سىلتەمە جاساپ.

جاس جىگىت – اتىراۋ وبلىسى يندەر اۋدانىنىڭ ەسبول اۋىلىنىڭ تۋماسى. جانبولات بوزبانوۆ 2017 جىلى ماۋسىم ايىندا اسكەرگە شاقىرىلعان. 21 قاڭتاردا ەش سەبەپسىز 21450 اسكەري ءبولىمىن تاستاپ كەتىپ قالعان. الايدا تۋىستارىنا ءوزى تۋرالى مالىمەت بەرمەگەن.

بويى – 175-180 سم، ورتاشا دەنەلى، كوزى قارا. ۇستىنە اسكەري بۋشلات كيگەن.

ساربازدىڭ اعاسى سوڭعى رەت جانبولاتپەن 7 قاڭتاردا حابارلاسقان. سول كۇنى جانبولات ودان 40 تەڭگە كولەمىندە اقشا جىبەرۋدى سۇراعان. الايدا بانك جابىق بولعاندىقتان، اعاسى جانبولاتقا بەس مىڭ تەڭگە جىبەرگەن. بۇدان كەيىن سارباز بايلانىسقا شىقپاعان.

– قاتارداعى ساربازداردىڭ ءبىرى تەلەفونىن جوعالتىپ الىپ، ول ءۇشىن مەنىڭ باۋىرىمدى كىنالاپ، ۇرىپ-سوققان. سودان كەيىن ول بولىمنەن قاشىپ كەتكەن. مەن ءقازىر جامبىل وبلىسىندا جانبولاتتى ىزدەستىرۋ جۇمىستارىنا قاتىسىپ ءجۇرمىن. ونىڭ تەلەفونى ءسوندىرۋلى. كەيدە قوڭىراۋ بارىپ تۇرادى، ءبىراق جاۋاپ بەرمەيدى، - دەيدى جانبولاتتىڭ اعاسى.

سارباز تۋرالى اقپارات بەرگىسى كەلگەندەر مىنا نومىرلەرگە حابارلاسۋى كەرەك:

– جامبىل وبلىسى قورداي اۋدانى گۆاردەيسكيي كەنتى، گۆاردەيسكيي گارنيزونىنىڭ اسكەري پوليسياسى، تەل/فاكس: 8(72636) 7-18-02

– تۋىستارىنىڭ بايلانىس ءنومىرى – 87026236698، 87018918357.