قازاقستان رەسپۋبليكاسى مادەنيەت جانە سپورت مينيسترلىگىنىڭ 2018 جىلعى 12 اقپانداعى بۇيرىعىمەن قازاقستاننىڭ ەڭبەك سىڭىرگەن قايراتكەرى، تەاتر رەجيسسەرى ماەميروۆ اسحات ماكسيم ۇلى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى قىزمەتىنە تاعايىندالدى، دەپ حابارلايدى Qamshy.kz اقپارات اگەنتتىگى م.اۋەزوا اتىنداعى دراما تەاترىنىڭ باسپا ءسوز قىزمەتىنە سىلتەمە جاساي وتىرىپ.
اسحات ماكسيم ۇلى ماەميروۆ – قازاقستاننىڭ ەڭبەك سىڭىرگەن قايراتكەرى، فيلوسوفيا عىلىمدارىنىڭ دوكتورى (PhD)، «بولاشاق» پرەزيدەنتتىك ستيپەندياسىنىڭ يەگەرى، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى. 2008 جىلى سوربونا ۋنيۆەرسيتەتىنىڭ ماگيستراتۋراسىندا ءبىلىم الىپ، فرانسياداعى پاريج ۇلتتىق دراما ونەرى كونسەرۆاتورياسىندا تاعىلىمدامادان وتكەن. 2010 جىلى ماسكەۋدىڭ اتاقتى جوعارعى وقۋ ورنى گيتيس-تە - رەسەي تەاتر ونەرى اكادەمياسىندا «رەجيسسۋرا ماگيسترى» عىلىمي اتاعىن الدى. 2015 جىلى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ دوكتورانتۋراسىن ءتامامداپ، «قازاقستاننىڭ تەاتر رەجيسسۋراسى: ساباقتاستىق پەن جاڭاشىلدىق (1991-2015 جج.)» تاقىرىبىندا دوكتورلىق ديسسەرتاسياسىن قورعاپ، «فيلوسوفيا دوكتورى» عىلىمي دارەجەسىنە يە بولدى.
ەڭبەك جولىن باتىس قازاقستان وبلىستىق قازاق دراما تەاترىندا رەجيسسەر بولىپ باستادى. قۇرمانعازى اتىنداعى ورال مۋزىكالىق كوللەدجىندە «اكتەرلىك ونەر» ءبولىمىنىڭ مەڭگەرۋشىسى، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ «تەاتر ونەرى» فاكۋلتەتىنىڭ دەكانى، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ «اكتەر شەبەرلىگى جانە رەجيسسۋرا» كافەدراسىنىڭ دوسەنتى بولدى. شىعارماشىلىق جۇمىستارىنان بولەك، ونەرتانۋ بويىنشا فيلوسوفيا دوكتورى رەتىندە عىلىمي ىزدەنىس جۇمىستارىنىڭ شەڭبەرى - زاماناۋي رەجيسسۋراداعى ءداستۇر مەن جاڭاشىلدىق ۇردىستەرى، قازىرگى زامانعى تەاتر ونەرىنىڭ دامۋ تەندەنسيالارى سىندى تاقىرىپتاردى قامتيدى.
وتاندىق مادەنيەتتىڭ قازىرگى زامانعى ۇزدىك ارت-مەنەدجەرلەرى قاتارىنا كىرەدى. ەلىمىزدىڭ مادەنيەت پەن ونەر سالاسىنداعى بەلگىلى ۇيىمدار – «قازاقستاننىڭ رۋحاني قورى» اق، «قازاق اۋەندەرى» اق جەتەكشىلىك ەتتى. 2017 جىلى قازاقستاندىق مادەنيەتتىڭ كوش باسىنداعى ەڭ ءىرى مۋزىكالىق ۇجىمداردىڭ ءبىرى – «قازاقكونسەرت» مەملەكەتتىك كونسەرتتىك ۇيىمىن باسقاردى. ەلوردالىق «استانا ميۋزيكل» تەاترىنىڭ كوركەمدىك جەتەكشىسى جانە قازاقستان تەاترلار اسسوسياسياسىنىڭ ۆيسە-پرەزيدەنتى بولىپ تابىلادى.
اسحات ماەميروۆتىڭ شىعارماشىلىق قىزمەتى تەاتر ونەرىمەن بايلانىستى. ول ع.مۇسىرەپوۆ اتىنداعى قازاقتىڭ مەملەكەتتىك اكادەميالىق بالالار مەن جاسوسپىرىمدەر تەاترىندا «قارا شەكپەن» (گ. حۋگايەۆ)، م.اۋەزوۆ اتىنداعى تەاتردا «قوشتاسقىم كەلمەيدى» (ا.ۆولودين)، «ۇلىم ساعان ايتام» (ب.بەدەلحان) اتتى سپەكتاكلدەردىڭ، اباي اتىنداعى مەملەكەتتىك اكادەميالىق وپەرا جانە بالەت تەاترىندا س.مۇحامەدجانۆتىڭ «ايسۇلۋ» وپەراسى، «استانا وپەرا» تەاترىندا «قىزجىبەك» وپەراسىن ساحنالاۋعا ات سالىستى. سونىمەن بىرگە «رومەو مەن دجۋلەتتا» (ج.پرەسگۋرۆيك)، «قىز جىبەك» (ە.برۋسيلوۆسكيي)، «استانا» (ب.عافۋ، ا.ورەنبۋرگسكيي) اتتى قازاقستاندىق ميۋزيكلدەردىڭ قويۋشى رەجيسسەرى رەتىندە تانىلدى.
بەلگىلى قازاقستاندىق رەجيسسەر قازاقستاننىڭ تەاتر ونەرىن بىرنەشە رەت حالىقارالىق ساحنالاردا تانىستىردى. اۆستريا، بەلگيا، گەرمانيا، يزرايل، رەسەي، اقش، تۇركيا، فرانسيا، ارمەنيا، گرۋزيا، پولشا، چەحيا جانە ت.ب. مەملەكەتتەردە وتكىزىلگەن تەاتر فەستيۆالدەرىندە، سيمپوزيۋمدار مەن فورۋمدارعا قاتىستى. 2009 جىلى قازاقستان ساحنا ونەرىنىڭ تاريحىندا تۇڭعىش رەت نيۋ-يورك قالاسىندا وتكەن م.چەحوۆ اتىنداعى ءى حالىقارالىق تەاتر فەستيۆالىندە «زووپاركتەگى وقيعا» سپەكتاكلىمەن (رەج.ا.ماەميروۆ) لاۋرەات اتاندى (اقش). 2017 جىلى ونىڭ «اقتاستاعى احيكو» اتتى سپەكتاكلى (رەج.ا.ماەميروۆ) توكيو قالاسىندا (جاپونيا) قويىلدى. وتكەن جىلدىڭ سوڭىندا «ۇلى دالا تەاترى» اتتى ەۋروپالىق تۋرنە شەڭبەرىندە «قىز جىبەك» ميۋزيكلىن (رەج.ا.ماەميروۆ) الەمنىڭ بەس استاناسى – بريۋسسەل، پاريج، ۆەنا، بەرلين جانە ماسكەۋ قالالارىنىڭ كورەرمەندەرى ەرەكشە ىقىلاسپەن قابىلدادى.
ءدال قازىرگى ۋاقىتتا «استانا وپەرا» مەملەكەتتىك وپەرا جانە بالەت تەاترىندا م.تولەبايەۆتىڭ «ءبىرجان-سارا» وپەراسىن ساحنالاۋ ۇستىندە. سونىمەن قاتار ەلىمىزد تۇڭعىش رەت وتكىزىلگەن جانە ءارى قاراي ءداستۇرلى جالعاستىعىن تاۋىپ جاتقان دۇنيەجۇزىلىك «استانا» تەاتر فەستيۆالىنىڭ، ق.سۇگىربەكوۆ اتىنداعى جاس رەجيسسەرلەردىڭ رەسپۋبليكالىق فورۋم-فەستيۆالىنىڭ، «ساحناگەر» ۇلتتىق تەاتر سىيلىعى-فەستيۆالىنىڭ ارت-ديرەكتورى.
يۋنەسكو جانىنداعى حالىقارالىق تەاتر ينستيتۋتىنىڭ قازاقستانداعى جۇمىسىن جۇرگىزۋ مارتەبەسىنە يە - مەملەكەتىمىزدىڭ تەاتر ۇجىمدارىنىڭ باسىن بىرىكتىرەتىن قازاقستان تەاترلارى اسسوسياسياسىنىڭ ۆيسە-پرەزيدەنتى.
