قازاقستاندىقتار ينچحون حالىقارالىق اۋەجايىندا قامالىپ قالدى، - دەپ حابارلايدى Tengrinews.kz ءتىلشىسى استانا تۇرعىنىنا سىلتەمە جاساپ. ولاردىڭ وندا جۇرگەنىنە ەكى كۇن بولعان. 

جازيرا تاۋبالدينوۆانىڭ ايتۋىنشا، ولار سەۋلگە اكەسىمەن بىرگە مەديسينالىق تەكسەرۋدەن ءوتۋ ءۇشىن جانە وليمپيادا ويىندارىن تاماشالاۋ ءۇشىن كەلگەن.

"ءبىز 10 اقپاندا كەلدىك. ءوز قاراجاتىمىزبەن تەكسەرىلۋگە جانە سوعان قوسا وليمپيادا ويىندارىن تاماشالاۋ ءۇشىن كەلدىك. سەنبىدەن بەرى اۋەجاي اۋماعىندا ءجۇرمىز. ۇستەلدەردە ۇيىقتاپ، اسحانادان تاماق ءىشىپ جاتىرمىز، الايدا اس ءمازىرىنىڭ كوپ تاماقتارىن جەي المايمىز. بارىپ قايتاتىن بيلەتتەردى، ءقوناقۇي برونىن كورسەتتىك، الايدا ءبىزدى وتكىزبەيدى. سەبەبىن دە تۇسىندىرمەيدى. بيلەتتەرىمىز بەن ءتولقۇجاتتارىمىزدى الىپ الدى. ءبىزدى جەرتولەگە جىبەردى، شامامەن 20-30 شاقتى قازاقستاندىق ازامات وسى جەردە ءجۇر"، - دەيدى قىز بالا.

ونىڭ ايتۋىنشا، كوپتەگەن قازاقستاندىق بۇگىن ەلگە قايتىپ ۇشىپ كەتكەن.  

 "اكەمىز ەكەۋىمىزدىڭ ەرتەڭ استاناعا بيلەتىمىز بار. كوبىنىڭ قايتاتىن بيلەتى جوق. وڭتۇستىك كورەياداعى قازاقستان ەلشىلىگىنە حابارلاسا الماي وتىرمىز"، - دەيدى جازيرا. 

ق ر سىرتقى ىستەر مينيسترلىگىنىڭ باسپا ءسوز قىزمەتىندەگىلەر وسى وقيعاعا قاتىستى پىكىر ءبىلدىردى. 

 "ءبىزدىڭ ديپلوماتتار ءمان-جايدى انىقتاپ جاتىر. ءوز ازاماتتارىمىزعا قولدان كەلگەن كومەكتى اياپ قالمايمىز. سونىمەن قاتار، وڭتۇستىك كورەياعا باراتىن كەزدەگى ۇسىنىستارمەن ءجىتى تانىسۋعا كەڭەس بەرەمىز"، - دەدى ۆەدومستۆو باسپا ءسوز قىزمەتىنىڭ باسشىسى ءانۋار جايناقوۆ.