ءيسى قازاققا تانىمال يمانعالي تاسماعامبەتوۆتىڭ استانا قالاسىنا اكىم بولىپ تاعايىندالعانىنا ەكىنشى جىل بولاتىن. مەن ول كەزدە ەلوردانىڭ ىرگەسىندەگى «پريگورودنىي» كەنتىندە تۇراتىن ەدىم. «قالا اكىمى حالىققا جىل سايىنعى ەسەبىن جاسايدى» ەكەن دەگەن حاباردى ەستي سالا سول كەزدەگى «كونگررەس حولل» سارايىنا ەل-جۇرتپەن بىرگە مەن دە باردىم.
يمانعالي نۇرعالي ۇلى الدىمەن ەلوردانىڭ الەۋمەتتىك-ەكونوميكالىق احۋالى مەن الدا اتقارىلاتىن جۇمىستار جايىندا جان-جاقتى بايانداپءوتتى. ال، ودان كەيىن جينالعان حالىق تاراپىنان قويىلعان سۇراقتارعا جاۋاپ بەردى. سول سۇراق قويعان كىسىلەردىڭ اراسىندا مەن تۇراتىن «پريگورودنىي» كەنتىنىڭ ءبىر تۇرعىنى دا بولدى. ول قالا اكىمىنە اتالمىش كەنتتەگى كوشە مەن تۇرعىن ۇيلەر ىرگەسىندەگى جۇلىم-جۇلىمى شىققان اعاشتار جايىن قوزعادى. استانا استانا بولعالى ەشقانداي كۇتىم كورمەگەن ونداعى كەيبىر اعاشتار ادام ومىرىنە ءقاۋىپ ءتوندىرىپ تۇرعانىن دا ادەمى جەتكىزدى. ونىڭ بۇل ورىندى كوتەرگەن ماسەلەسىن مۇقيات تىڭداعان يمەكەڭ زالدا وتىرعان ءبىر ورىنباسارىن ورنىنان تۇرعىزدى دا «مىنا ماسەلەنى دەرەۋ شەشىڭدەر» دەپ تاپسىرما بەردى.
ءوز باسىم، بۇل جينالىستىڭ سوڭىنا دەيىن بولا المادىم. ءوزىم تۇراتىن كەنت جاقتا جەكە شارۋام شىعىپ قالدى دا، سول جاققا قاراي جول تارتتىم. ەندىگى قىزىقتى قاراڭىز، جول بويىندا «پريگورودنىي» كەنتىنە قاراي كوش تۇزەگەن قالانىڭ كوگالداندىرۋ باسقارماسىنىڭ بىرنەشە كولىگىن كوزىم شالىپ قالدى. وندا كولىكتىڭ نەشە ءتۇرى بار، ءتىپتى جوعارىعا كوتەرەتىن ساتىسى بار «كرانعا» دەيىن. بۇعان جۇمىسشىلار جايعاسقان ەكى-ۇش جۇك كولىگىن دە قوسىڭىز. نە كەرەك، بۇلاردىڭ «بەس قارۋى تۇگەل». ولار دىتتەگەن جەرىنە جەتە سالىسىمەن كەنت ىشىندەگى اعاشتاردى وتاۋعا بەل شەشە كىرىسىپ كەتتى. نەسىن جاسىرايىن، مەن جەكە شارۋامدى جيىپ قويىپ، الگى جۇمىسشىلاردىڭ ارەكەتىن كوپ ۋاقىت تاماشالاپ تۇردىم. تاسماعامبەتوۆتىڭ بەرگەن تاپسىرماسىنىڭ ىزبە-ىز ورىندالىپ جاتقانىنا قاتتى تاڭ قالدىم ءھام تامساندىم. وزدەرىڭىز ويلاپ قاراڭىزدارشى، تاپسىرما جينالىس كەزىندە بەرىلدى. سول بەرىلگەن تاپسىرما جينالىس ءجۇرىپ جاتقان ۋاقىتتا جۇزەگە اسىپ جاتىر. مىنە، ناعىز ءىستىڭ ادامى دەپ وسى كىسىنى ايتۋعا بولادى. ءسوزى مەن ءىسى تارازى باسىن تەڭەستىرىپ تۇر. مۇنى ءبىر دەڭىز.
ەكىنشى، ءبىزدىڭ كەنتتەگى جۇمىس مۇنىمەن بىتكەن جوق. توز-توزى شىققان كوشەلەرى تۇزەلدى. تۇرعىن ۇيلەردىڭ بارلىق اۋلاسىنا كۇردەلى جوندەۋ جۇمىستارى جۇرگىزىلدى. قىسقاسى، ءبىر جىلدىڭ ىشىندە كەنت كەلبەتى ادام تانىماستاي وزگەردى. شاعىن سۇلۋ كەنتكە اينالىپ شىعا كەلدى. ەگەر سەنبەسەڭىز مەن ءسوز ەتكەن كەنتكە ارنايى بارىپ، ءبىر سەرۋەندەپ كورىڭىزشى. سونداعى جەرگىلىكتى تۇرعىنداردان كەنتتىڭ كەشەگىسى مەن بۇگىنىن سۇراۋدى دا ۇمىتپاڭىز. تاسماعامبەتوۆتىڭ كەزىندە قىرۋار تىرلىك جاسالعانىن جىر قىلىپ ايتىپ بەرەتىنىنە تيتتەي دە كۇمانىم جوق.
ەرلىباي وزبەكباي ۇلىنىڭ فەيسبۋك پاراقشاسىنان الىنعان
پىكىر قالدىرۋ