وڭتۇستىك قازاقستان وبلىسىنداعى ەرلى-زايىپتى شىڭعىس حاننىڭ زيراتىن تاپقانىن ايتتى دەپ حابارلايدى Qamshy.kz اقپارات اگەنتتىگى تۆك ارناسىنىڭ دەرەگىن نەگىزگە الا وتىرىپ. ءوزىن «كورىپكەل»، - دەپ ەسەپتەيتىن گۇلجانار التىنبەكوۆا موڭعول بيلەۋشىسىنىڭ جەرلەنگەن جەرىن بىلەتىنىنە سەنىمدى. ەرلى-زايىپتىلار عالىمداردىڭ كەلۋىن كۇتپەي ءوز بەتىمەن قازبا جۇمىستارىن جۇرگىزگەن. كورىپكەل ايەل ءمايىتتى تابۋ ءۇشىن ەندى 30 سانتيمەتر جەر قازۋ كەرەكتىگىن ايتتى.

وقو-نىڭ كوپتەگەن تۇرعىندارى گۇلجاناردى «باقسى»، - دەپ اتاپ كەتكەن. سەبەبى 2014 جىلى وعان ماناس اتتى باباسى ارىس اۋدانىنداعى كىشكەنتاي لەسحوز دەگەن ەلدى-مەكەندە كەزىندە بۇكىل الەمدى بيلەگەن ادام جەرلەنگەنىن ايتقان.

«ءقازىر بابامىز ءمارمار تاستا جاتىر. جانىندا ەكى جاعىلعان شام مەن زيراتىن كۇزەتىپ وتىرعان جىلان، قامشى مەن تاسبيح بار»، دەيدى گۇلجانار التىنبەكوۆا.

ەرلى-زايىپتىلار قازبا جۇمىستارىمەن 2 جىلدان بەرى اينالىسىپ كەلە جاتىر. 2 جىل ىشىندە تالاي تىلسىم دۇنيەلەرگە تاپ بولعانىن ايتادى.

«ءبىز بۇل ايماقتان باتپاققا جازىلعان ەكى جازبا تاپتىق. ەكى جازبادا دا "اتا-بابامىز شىڭعىس حان" دەپ جازىلىپ تۇردى»، - دەيدى سمان وتەگەن.

شىڭعىس حاننىڭ جەرلەنگەن ورنىن تاپتىق دەگەن ەرلى-زايىپتىلار كارتا رەتىندە رەتىندە تاستى قولدانعان. ولاردىڭ ايتۋىنشا، بۇل تاس ولارعا باعىت باعدار بەرىپ وتىرعان.

«زيراتتىڭ كىرە بەرىسىندەگى قازاق تىلىندەگى جازۋ شىڭعىس حاننىڭ موڭعول ەمەس، قازاق ەكەنىن دالەلدەي تۇسەدى»، - دەيدى جەرگىلىكتى تۇرعىن ماحمەتكارىم شاناسوۆ.

ال تاريحشىلار مەن عالىمدار ەرلى-زايىپتىلاردىڭ تۇجىرىمىنا سەنۋگە اسىعار ەمەس. ولار بەلگىسىز ايماقتى ءجون-جوسىقسىز قازۋ قايعىلى جاعدايعا اكەلىپ سوقتىرۋى مۇمكىن ەكەنىن ەسكەرتۋدە.

ەسكە سالساق، بۇعان دەيىن دە شىڭعىس حاننىڭ زيراتىن تاپقانىنا سەنىمدى بولعان گۇلجانار 13 مەتر تەرەڭدىككە باراتىن شۇڭقىر قازدىرتىپ، ەشقانداي زيرات تاپپاعان بولاتىن.

بۇل سەنساسيالىق جاڭالىق وڭتۇستىكتەردى اسا تاڭعالدىرماۋى مۇمكىن. سەبەبى وسىدان ءبىراز جىل بۇرىن شىمكەنتتىك جازۋشى شىڭعىس حاننىڭ زيراتى شاردارا اۋدانىندا دەگەن بولاتىن.