بۇگىن استانادا شەتەلدەگى ەتنيكالىق قازاقتارىنىڭ تاريحى مەن بۇگىنگى الەۋمەتتىك تۇرمىسىن باياندايتىن «قيىرداعى قازاقتار» دەرەكتى ءفيلمىنىڭ تۇساۋكەسەرى ءوتتى، دەپ جازادى Qamshy.kz ءتىلشىسى. بۇل 8 ءبولىم بولادى دەپ جوسپارلانعان الىس-جاقىن شەتەلدەردە ءومىر سۇرەتىن قازاقتار تۋرالى ءفيلمنىڭ العاشقى سەرياسى.

ءار ءبولىمى 40 مينۋتتان جاسالاتىن اتالعان جوبانى ق ر اقپارات جانە كوممۋنيكاسيالار مينيسترلىگى 2017 جىلى شىلدەدە جوسپارلاپ، جۇزەگە اسىردى. دەرەكتى فيلم ۇلتتىق سانا مەن ءتول تاريحتى جاڭعىرتۋ، الىس-جاقىن شەتەلدەردە تۇرىپ جاتقان قازاقتاردىڭ شىنايى ءومىرىن كورسەتۋ ماقساتىندا تۇسىرىلگەن. فيلمگە كاسىپكەر ورالبەك بوتباي دەمەۋشىلىك ەتكەن.  جوسپار بويىنشا فيلم اعىلشىن تىلىنە اۋدارىلادى.

ءتۇسىرىلىم توبى وتە اۋقىمدى جۇمىستاردى اتقارعان. رەسەيدىڭ استراحان، موڭعوليانىڭ ۇلانباتىر قالاسىن، وزبەكستان استاناسى تاشكەنتتەگى كەنيمەح اۋدانىنا دەيىنگى جانە تاجىكستاننىڭ حۋدجاند قالاسىنا دەيىنگى جەردى، باس اياعى ون مىڭداعان شاقىرىم جولدى باسىپ وتكەن. عاجايىپ تاريحي ورىنداردى كوزىمەن كورىپ، ەرەكشە تاعدىر يەلەرىن تاسپاعا تۇسىرگەن.

استانادا تۇساۋكەسەرى وتكەن «قيىرداعى قازاقتار» دەرەكتى فيلمدەر توپتاماسىنىڭ موڭعوليا قازاقتارىنا ارنالعان ءبولىمى كوپتىڭ كوڭىلىنەن شىقتى. تۋىندىدا ۇلانباتىر قالاسى مەن وعان جاقىن ورنالاسقان نالايحان اۋدانىندا عۇمىر كەشىپ جاتقان ەتنيكالىق قازاقتاردىڭ بۇگىنگى تىرشىلىگى كورسەتىلەدى. دەرەكتى ءفيلمدى ءتۇسىرۋ بارىسىندا ق ر ءسىم بىرلەسە وتىرىپ، جوعارىدا جازىلعان ەلدەردەگى ق ر ەلشىلىكتەرىمەن بىرلەسكەن جۇمىس اتقارىلعان.

«بۇل - ەلباسىنىڭ «رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا قولعا الىنعان جوبا. ەڭ باستىسى، بۇل جوبانى تەك قانا باستاما دەپ ەسەپتەيمىز. شەتەلدە 5 ميلليونعا جۋىق قازاقتىڭ تۇرىپ جاتقانى بىزگە بەلگىلى. سوندىقتان، ولارعا ءبىز ەرەكشە نازارمەن قارايمىز. ەكىنشى جاعىنان ەلباسى ايتقانداي، ولارعا قازاقستاننىڭ ءارقاشان ەسىگى اشىق. 25 جىلدىڭ ىشىندە 1 ميلليونعا جۋىق قانداستارىمىز ەلگە كەلدى. دەرەكتى ءفيلمدى دەمەۋشىلىك ەتكەن ورالبەك بوتباي مىرزاعا، «قازكونتەنت» باسقارماسىنىڭ ءتوراعاسى ەۆگەنيي كوچەتوۆ مىرزاعا زور العىسىمدى ايتقىم كەلەدى. قانى قازاق بولماسا دا، زاتى قازاق (كوچەتوۆ تۋرالى - اۆت.). وسىنداي جوبانى ءوزى (ەۆگەنيي كوچەتوۆ - اۆت.) ۇسىندى»، - دەدى ءفيلمنىڭ تۇساۋكەسەرىندە ق ر اقپارات جانە كوممۋنيكاسيالار ءمينيسترى داۋرەن ابايەۆ.

ماڭىزدى ءىس-شارا قانداستاردىڭ تاريحي وتانىنان بەيىمدەلۋ ماسەلەرىنە تاعى ءبىر نازار اۋدارۋعا جانە تاريحي وتانىنان تىس ءومىر ءسۇرىپ جاتقان ەتنيكالىق قازاقتاردىڭ ماسەلەلەرىن كوتەرۋگە جول اشادى.

اتالعان جوبا دۇنيە ءجۇزى قازاقتارى قاۋىمداستىعىنىڭ 25 جىلدىعىنا ارنالىپ وتىر. دەرەكتى ءفيلمنىڭ ماقساتى – قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ اياسىندا ۇلتتىق سانامىزدى جاڭعىرتۋ جانە ءتول تاريحىمىزعا تىڭ سەرپىلىس اكەلۋ. الىس-جاقىن شەت ەلدەردەگى قازاقتاردى وتانىمىزعا ورالۋعا ناسيحاتتاۋ.