استانادا ءماجىلىس دەپۋتاتتارى، اۋىل شارۋاشىلىعى مينيسترلىگى وكىلدەرى مەن ازاماتتىق بەلسەندىلەر جەر ماسەلەسىن تالقىلاپ جاتىر. قوعامدىق تىڭداۋدا ءسوز سويلەگەن تاۋەلسىز جۋرناليست رىسبەك سارسەنباي قىتايمەن شەكارا بولىسكەندە قازاقستاننىڭ ۇتىلىپ قالعانىن ايتتى، دەپ جازادى Qamshy.kz اقپارات اگەنتتىگى.

– «قىتايمەن شەكارانى دەليميتاسيالاعاندا ەسەمىزدى جىبەرمەدىك»، – دەيدى عوي شەنەۋنىكتەر. مەن ءوزىم رايىمبەك اۋدانىنىڭ تۋماسىمىن. ول وڭىردە سارىتاۋ دەگەن تاۋ بار. قاراعايى جايقالعان، سۋلى-نۋلى ولكە. سول جەر قىتايعا قاراپ كەتتى. ال ءبىزدىڭ بيلىك دەليميتاسيا ءساتتى اياقتالدى دەيدى. وسىندايدا شەرحان مۇرتازا اعامىز: «اتاسىنىڭ باسى»، – دەۋشى ەدى. انايىلاۋ بولسا دا، سول ءسوزدى ايتۋعا تۋرا كەلەدى. وتىرىك ول، جالعان نارسە. ايرىلدىق. سونداي نارسەلەرگە جول بەرىلمەس ءۇشىن اۋىل شارۋاشىلىعى ماقساتىندا پايدالاناتىن جەردىڭ ماسەلەسىن عانا ەمەس، تۇتاس جەر ماسەلەسىن قاراۋىمىز كەرەك، – دەدى جۋرناليست.

ول سونىمەن قاتار جەر رەفورماسىنا قارسى ميتينگىگە قاتىسقانى ءۇشىن سوتتالعان ماكس بوقايەۆ پەن تالعات اياندى ەسكە الىپ ءوتتى.

– ءبىز ءقازىر مىنا قوناقۇيدە، جىلى، جايلى جەردە وتىرمىز. ال ماكس پەن تالعات تار قاپاستا قامالىپ جاتىر. تاۋەلسىزدىككە، مەملەكەتتىلىككە، تۇتاستىققا قاتەر توندىرگەن سول قيعاشتىققا ءبىز دە كەلىسپەدىك. قۋعىنداۋعا، ەسكەرتۋگە قاراماستان، كوپپەن بىرگە كوشەگە شىقتىق. قارسىلىق بىلدىردىك. ۇستادى، تەرگەدى، اكىمشىلىك سوتقا تارتتى، ايىپ تولەتتىردى. انىعىندا، بيلىكتىڭ كوزىمەن قاراساق، ماكس بوقايەۆ پەن تالعات ايان جاساعان «قىلمىستى» ءبىز دە جاسادىق، – دەدى رىسبەك سارسەنباي.