مۇراتحان ءتوقمادي سوتتا ءوز كىناسىن مويىندادى، - دەپ حابارلايدى Tengrinews.kz.

"كىناڭىزدى مويىندايسىز با؟"، - دەپ سۇرادى سۋديا.

"ءيا"، - دەپ جاۋاپ بەردى مۇراتحان ءتوقمادي.

"تولىقتاي مويىندايسىز با؟"، - دەپ ناقتىلادى سۋديا. 

"ءيا"، - دەپ جاۋاپ بەردى بيزنەسمەن.

پروكۋرور كورسەتىلگەن ايىپتاۋلاردى وقىپ شىققاننان كەيىن سۋديا باستى سوت وتىرىسىنىڭ قانداي ءتارتىپ بويىنشا وتەتىنىن ءتۇسىندىردى.

سوتتالۋشى مۇنىمەن كەلىستى، تۇسىنىك بەرۋگە دايىن. قازىرگى ۋاقىتتا بيزنەسمەن سوت الدىندا جاۋاپ بەرىپ جاتىر.

وسىعان دەيىن مۇراتحان ءتوقماديدىڭ تاراز قالاسىنىڭ سوتىنا جەتكىزىلگەنى حابارلانعان بولاتىن.

"05.02.2018 جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا م.ش. توقماديگە قاتىستى 96-باپتىڭ 2 تارماعى "ج، ز" بويىنشا قىلمىستىق ءىس كەلىپ ءتۇستى. ءىس ماتەريالى بويىنشا، الماتى قالاسىندا قىلمىستىق الەمنىڭ "بەدەلدىسى" جانە "دەپۋتاتتىق كورپۋس" ۇقت باسشىسى م.ش.ءتوقمادي "بانك تۇران الەم"اق باسقارماسىنىڭ بۇرىنعى ءتوراعاسى ە.ن.تاتىشيەۆتى ءولتىردى دەپ ايىپتالىپ وتىر. بۇل قىلمىستىق ءىس "تورەلىك" اقپاراتتىق جۇيەسىمەن سۋدياعا قاراستىرۋعا ۇلەستىرىلگەن. قىلمىستىق ءىستى قاراۋدىڭ مەرزىمى مەن كۇنى بەلگىلەنبەدى"، - دەپ حابارلاعان ەدى جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتىندەگىلەر.

ەسكە سالا كەتەيىك، مۇراتحان ءتوقمادي بىلتىر 12 ماۋسىمدا ۇستالعان بولاتىن. الماتىدا ارنايى قىزمەت "دەپۋتاتتىق كورپۋس" اتتى قىلمىستىق توپتى ۇستاۋ بويىنشا وپەراسيا وتكىزگەن ەدى. باق-تا شىققان اقپارات بويىنشا، بۇل قىلمىستىق توپتى "قازشىنىقۇرىلىس" زاۋىتىنىڭ يەسى مۇراتحان ءتوقمادي باسقارعان. سونداي-اق، پروكۋراتۋرا مالىمەتىنشە، ونىڭ ءۇيىن ءتىنتۋ كەزىندە قارۋ-جاراق پەن ءوق-دارى تابىلعان. ال تاياۋدا بيزنەسمەنگە قاتىستى ۇكىم شىققان. مۇراتحان ءتوقمادي 3 جىلعا باس بوستاندىعىنان ايىرىلعان بولاتىن.